日期: 2011-10-22
来自: གངས་བུ་རྩེ་རྒྱལ།
主题: སེང་འབྲུག་སྟག་རྩེའི་སློབ་གྲྭ
སེང་འབྲུག་སྟག་རྩེའི་སློབ་གྲྭའི་ངོ་སྤྲོད་མདོར་བསྡུས། དེ་སྔོན་ཕྱུགས་ཟོག་ཁོ་ན་འཚོ་སྐྱོང་གིས་ནམ་ཟླ་སྐྱེལ་བའི་མགོ་ལོག་གི་འབྲོག་ཁུལ་ལ་མཚོན་ན་བྱིས་པ་ཕལ་མོ་ཆེ་དམ་པའི་ཆོས་ཀྱི་ཤེས་བྱ་ལྟ་ཅི་འཇིག་རྟེན་བླང་དོར་གྱི་ཤེས་བྱ་ཙམ་ཡང་སློབ་པའི་གོ་སྐབས་ཀྱིས་དབེན་ན། དེ་བས་ཀྱང་ཕ་མ་དང་བྲལ་བའི་ཉམ་ཐག་དྭ་ཕྲུག་དག་བཤད་མ་དགོས་པ་ཞིག་རེད། བདག་རང་ངོས་ནས་ཕ་ཡུལ་འབྲོག་ཕྱོགས་ཀྱི་བྱིས་པའི་སློབ་གསོའི་ཐད་ལ་འདིང་རེ་རྒྱག་མྱོང་། སྟབས་ལེགས་པ་ཞིག་ལ་ཆོས་གྲོགས་ཀུན་བཟང་རྒྱལ་མཚན་མཆོག་དང་གྲོས་བྱས་ཏེ་ཞེ་བློ་གཅིག་མཐུན་གྱི་ཐོག་ནས་སློབ་གྲྭ་ཞིག་བསྒྲུབ་པར་གྲོས་བྱས་ཏེ་ཁུལ་དང་རྫོང་རིམ་པའི་ཆོག་མཆན་དང་རྒྱབ་སྐྱོར་ཐོབ་པའི་འོག་ནས་དྭ་ཕྲུག་གཙོ་བོར་གྱུར་པའི་སློབ་གྲྭ་འདི་བཙུགས་པ་ཡིན། དེ་ཡང་༡༩༩༩ལོའི་ཟླ་༩པར་སློབ་མགོ་དངོས་སུ་ཚུགས། ས་གནས་ནི་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དར་ལག་རྫོང་གི་ཁོངས་གཏོགས་གླིང་རྗེ་གེ་སར་གྱི་གདན་ས་སྐུ་མཁར་སེང་འབྲུག་སྟག་རྩེའི་གཞིས་སུ་ཡིན། སློབ་གྲྭའི་མདུན་ཕྱོགས་སུ་རྨ་ཆུ་དལ་བ་རིང་མོ་དལ་གྱིས་རྒྱུ་ཞིང་རྨ་ཡུལ་གྱི་ལུང་བ་ཆེ་ཆུང་མང་པོ་པད་མའི་འདབ་མ་བཞིན་བཀྲ་ཞིང་ཁ་སློབ་གྲྭའི་ཕྱོགས་སུ་འཁོར་ཡོད། སློབ་གྲྭའི་གཡས་གཡོན་དང་རྒྱབ་རི་ལ་བཀྲ་ཤིས་རྟགས་བརྒྱད་ཀྱིས་མཚན་པར་བཤད། གང་ལྟར་ཡང་དབྱར་དུས་སུ་རྨ་ཡུལ་མཐོང་བ་ཀུན་སྨོན་ཟེར་བ་འདི་ལོས་ཡིན་སྙམ་པའི་ཚོར་བ་རེ་སྟེར་ཐུབ། ད་ལྟ་སློབ་གྲྭ་འདི་སློབ་ཆུང་ལོ་རིམ་དྲུག་དང་དམའ་འབྲིང་ལོ་རིམ་གསུམ་སྟེ་ལོ་རིམ་དགུ་ལས་གྲུབ་ཡོད། སློབ་གྲྭ་འདིར་ཡུལ་དུས་དང་བསྟུན་ན་སློབ་འབྲས་མི་དམན་པ་ཐོན་ཡོད། ཁྱད་པར་དུ་སྲོལ་རྒྱུན་རིག་གནས་ཐད་སྐད་གྲགས་ཅུང་ཟད་ཡོད།འདི་ནས་སློབ་མཐར་ཕྱིན་པའི་སློབ་མ་བརྒྱ་ཕྲག་ལྷག་པེ་ཅིན་མི་རིགས་སློབ་གྲྭ ནུབ་བྱང་མི་རིགས་སློབ་གྲྭ སི་ཁྲོན་བོད་ཡིག་སློབ་གྲྭ ལྷ་ས་སྟོད་ལུང་བདེ་ཆེན་སློབ་གྲྭ རྨ་ལྷོ་གསོ་རིག་སློབ་གྲྭ མཚོ་ལྷོ་གསོ་རིག་སློབ་གྲྭ མགོ་ལོག་དགེ་འོས་སློབ་གྲྭ་སོགས་སུ་བཏང་ནས་སློབ་སྦྱོང་བྱེད་ཀྱིན་ཡོད། ད་རུང་ཕུལ་བྱུང་གི་སློབ་མ་གཉིས་ཨ་རིའི་རྒྱལ་ཁབ་ཏུ་སློབ་སྦྱོང་དུ་སོང་ཡོད། ལོ་རེ་བཞིན་འཛིན་གྲྭ་རེ་མཐར་ཕྱིན་པ་དང་མཉམ་དུ་འཛིན་གྲྭ་རེ་བསྡུ་བཞིན་ཡོད་པས་རྒྱུན་ལྡན་སློབ་མ་༣༢༠ཡས་མས་དང་དགེ་རྒན་ཉི་ཤུ་ལྷག་བཞུགས་ཡོད་ཅིང་སློབ་གྲྭའི་གཙོ་འགན་མཁན་སྤྲུལ་ཀུན་བཟང་རྒྱལ་མཚན་གྱིས་བཞེས་ཡོད་དོ། ། ཞེས་སེང་འབྲུག་སློབ་གྲྭའི་ངོ་སྤྲོད་ཙམ་དུ་མགར་ཐུབ་བསྟན་ནོར་བུ་ནས་༢༠༡༡ལོའི་ཟླ༡༠ཚེས་༢༡བྲིས་པའོ། ། །།
