日期: 2012-03-28
来自: གངས་བུ་རྩེ་རྒྱལ།
主题: དུས་ཐོག་ཆར་བ། ༤༧
ཆོས་སྤེལ་བའི་སྙིང་སྟོབས།
ང་ཚོས་དུས་རྒྱུན་ཕྱི་རོལ་པ་དག་ལ་མུ་སྟེགས་པ་ཞེས་མར་ཞབས་སུ་གཅོད་ཀྱི་ཡོད་ལ། ཡེ་ཤུ་པས་ཆོས་ཀྱི་སྙིང་པོ་སྙིང་རྗེ་ཡིན་ཟེར་གྱི་ཡོད་ན་ཡང་བྱང་ཆུབ་ཀྱི་སེམས་ཟེར་བ་ལྟ་བུ་ང་ཚོ་ནང་བཞིན་གཡེར་བོ་ཆེ་ཤོད་རྒྱུ་ཡོད་པ་མ་རེད་དེ། ཁོང་ཚོས་མི་ཚེ་བློས་བཏང་ནས་ཆོས་སྤེལ་གྱི་ཡོད་པ་རེད།
ལྷོ་ཨ་ཧྤི་རི་ཁ་ལྟ་བུ། ཡི་དྭགས་ཀྱི་ཡུལ་དངོས། བྱེ་ཐང་ཆེན་པོ། ལོ་རེ་རེ་བཞིན་དུ་ཐན་པ་ཆེན་པོ་དང་།སྐབས་སྐབས་སུ་ནད་ཡམས་འདྲ་མིན་ཀྱང་ཡོང་ས། ཕར་ཕྱིན་ནས་ཚུར་ལོག་ཐུབ་པ་ཡང་ཤིན་ཏུ་དཀའ་བ་ལྟ་བུའི་ཡུལ་གྲུ་དག་གི་ཞིང་སྡེ་དང་གྲོང་གསེབ་ཉམ་ཐག་པ་དག་ཏུ་སོང་ནས་མི་ལོ་མང་པོར་འཆར་གཞི་བཞག་ཏེ། སྨན་ཁང་དང་སློབ་གྲྭ་བཙུགས་ནས་གཞི་ནས་ཆོས་སྤེལ་བ་སོགས་བྱེད་ཀྱི་ཡོད། དེ་འདྲའི་དབང་གིས་རྒྱ་ནག་གི་ཡང་ཞིང་པ་མང་པོས་ཡེ་ཤུའི་ཆོས་ལུགས་ལ་སློབ་ཀྱི་ཡོད།
ཁོང་ཚོའི་ཆོས་སྤེལ་བའི་སྙིང་སྟོབས་ལ་གཅིག་ལྟོས་དང་། རྒྱལ་ཁབ་དང་རྒྱལ་ཁབ། ཐ་ན་རྒྱ་མཚོ་ཆེན་པོ་ཡང་བརྒལ་ནས་ཆོས་སྤེལ་བ་ལས་ཕྱིར་ཨ་མི་རི་ཁ་ལྟ་བུར་སོང་ནས་སྐྱིད་པོ་བྱེད་སྙམ་པ་མེད་པ་རེད།
འོན་ཀྱང་ང་ཚོ་ག་ཤེད་ཅིག་ཏུ་སོང་ན་ཡང་། སྔོན་ཆད་བོད་ཀྱི་འབྲོག་སྡེ་ཕྱུག་ཤོས་རྨ་སྟོད་དང་རྨེ་བ་སོགས་སུ་འགྲོ་ཞིང་། ད་ལྟ་དེ་ལ་འགྲོ་མཁན་གཅིག་ཀྱང་མེད་པར་ས་ཆ་སྐྱིད་ལ་བཟའ་བཏུང་ཞིམ་པ།སྒོར་མོ་རྙེད་པ་སོགས་ལས་སླ་པོས་དོན་དག་མང་པོ་འགྲུབ་ཀྱི་ཡོད་པས་རྒྱ་ཡུལ་གྱི་གྲོང་ཁྱེར་ཁོ་ནའི་ནང་དུ་འགྲོ་བ་རེད། ང་ཚོས་བྱང་ཆུབ་ཀྱི་སེམས་ཟེར་བ་དེ་ཁ་ནས་ཤོད་པ་ཙམ་ལས་དོན་དུ་སྒྲུབ་ཀྱི་མེད།
ང་ཚོར་མཚོན་ན། མི་ལོ་ཉི་ཤུ་ཙམ་ལ་སེམས་བསྐྱེད་ཀྱི་ཐོག་ནས་སེམས་བསྐྱེད་ཀྱི་མཚན་ཉིད་གང་ཡིན།མཚན་ཉིད་ཀྱིས་མཚན་གཞི་ལ་ཁྱབ་མ་ཁྱབ། ས་མཚམས་གང་ཡིན། སངས་རྒྱས་ཀྱི་རྒྱུད་ན་འདུག་གམ་མི་འདུག་སོགས་ལ་རྩོད་པ་བརྒྱབ་པ་རེད་དེ། སངས་རྒྱས་ཀྱི་རྒྱུད་ན་ཡོད་ཀྱང་རུང་མེད་ཀྱང་རུང་ང་ཚོར་མི་འདུག གལ་ཏེ་ཡོད་ན་ང་ཚོས་ཀྱང་བྱ་བ་རེ་སྒྲུབ་དགོས་ཀྱི་རེད་དེ་ང་ཚོས་དེ་ཡང་མི་སྒྲུབ། དེས་ན་ཉམས་ལེན་བྱས་ནས་ལག་ལེན་དུ་མ་བསྟར་ན་མི་ཚེ་མགོ་གང་གི་རིང་ལ་འདི་རིགས་ཀྱི་ཐོག་ནས་ཁ་ངོ་དམར་པོ་བྱས་ནས་རྩོད་པ་མང་པོ་བྱེད་པར་དོན་དག་མི་འདུག མདོར་ན་ཕྱི་རོལ་པ་དག་གིས་སྒྲུབ་རྒྱུ་དེ་ཡང་ང་ཚོས་སྒྲུབ་ཐུབ་ཀྱི་མེད་ན་ཡང་། ད་དུང་བོད་ཀྱི་བླ་མ་ཚོས། ང་ཚོ་བྱང་ཆུབ་སེམས་དཔའ་ཡིན། བླ་མ་ཡིན་ཟེར་ནས་ཁྲིའི་ཐོག་དང་གདུགས་ཀྱི་འོག་ཏུ་ཆེན་པོ་དང་གཡེར་བོ་ལས་ནས་བསྡད་ཡོད། རྒྱལ་སྲས་ཞི་བ་ལྷ་ལས་ལྷག་པའི་བྱང་ཆུབ་སེམས་དཔའ་ཞིག་ཡོད་རྒྱུ་མ་རེད་དེ་ཁོང་ཡང་དམངས་ཁྲོད་དུ་ཕེབས་པ་ཞིག་རེད།དེས་ན་ང་ཚོ་ཡང་དམངས་ཁྲོད་དུ་སོང་ནས་ལས་ཀ་བྱེད་དགོས་པ་རེད། འོན་ཀྱང་། ང་ཚོ་དགོན་པ་ཞིག་གི་ནང་དུ་གོ་ས་ཞིག་བཟུང་ནས་འདུག་པ་མ་གཏོགས་དམངས་ཁྲོད་དུ་སོང་ནས་ནད་པ་ཚབ་ཆེན་ཞིག་ལ་ནད་གཡོག་བྱས་ནས་སྡོད་མཁན་ཞིག་ཅི་ཙམ་འདུག བསམ་བློ་ཞིག་ཐོངས་དང་།
བོད་ཀྱི་བླ་མ་ཇི་ལྟར་ཆེ་ཡང་སངས་རྒྱས་དང་བྱང་ཆུབ་སེམས་དཔའ་ཡན་ཞིག་ཡོད་ཐབས་མེད་ན་ཡང་།སངས་རྒྱས་ཐུགས་རྗེ་ཅན་གྱིས་ནི་ང་ཚོའི་ལས་ཀ་བྱེད་སྟངས་ལྟར་གནང་མེད། དེ་ཡང་སྔོན་ཉི་མ་གཅིག་ལ་སངས་རྒྱས་ཐུགས་རྗེ་ཅན་གྱིས་ཆེད་གཏད་ཀྱིས་དགེ་སློང་རྣམས་ལ། དེ་རིང་ང་བསོད་སྙོམ་ལ་འགྲོ་གི་མིན། ཁྱེད་ཅག་གིས་ང་ལ་གསོལ་ཚིགས་ཚུར་ཁུར་ཤོག་གསུངས་ནས་ཁོང་ཉིད་རྗེས་སུ་བཞུགས་ཏེ་དགེ་སློང་ནད་པ་དག་གི་ནད་གཡོག་བྱས་ནས་ཆབ་སྟན་འཁྲུད་པ་སོགས་གནང་མྱོང་བ་འདུལ་བ་ལུང་གི་ནང་དུ་གསུངས་འདུག་སྟེ། ང་ཚོ་བོད་ཀྱི་བླ་ཆེན་ཞིག་ཕར་ཞོག དགོན་པ་གཅིག་གི་དགོན་དཔོན་ཙམ་ཡིན་ན་ཡང་མཐོ་ས་ཞིག་ནས་བསྡད་འདུག་རྒྱུ་མ་གཏོགས་མི་སྐྱ་ཕོ་མོ་ཉམ་ཐག་ཅིག་ལ་ནད་གཡོག་ལ་འགྲོ་དགོས་རེད་ཟེར་ན། དེ་ཁོ་ལ་ཚད་ལས་བརྒལ་བའི་དམའ་འབེབ་སྡུག་ཤོས་ཞིག་རེད་བསམ་གི་རེད། དེ་ཙམ་མ་ཟད་དཔེ་ཆ་བ་གཞུང་བཀའ་པོད་ལྔ་ལ་འཆད་རྩོད་རྩོམ་གསུམ་བྱེད་མཁན་ཞིག་ཡིན་ཡང་། མ་གིའི་རྒད་པོ་རྒན་མོ་ཞིག་ལ་ནད་གཡོག་གྱིས་ལབ་པ་ཡིན་ན་གཞན་དག་གིས་ཀྱང་མི་འོས་པ་ཞིག་རེད་བསམ་གི་རེད་ལ། ཁོ་རང་གིས་ཀྱང་རང་ཉིད་ཐེག་པ་ཆེན་པོའི་ཆོས་དང་ཁ་ཁར་གྱུར་པའི་སྟོབས་ཀྱིས་ང་དོན་མེད་པ་འདི་འདྲ་ཞིག་ལ་མངགས་བྱུང་བསམ་གི་རེད་མོད། ཐེག་པ་ཆེན་པོའི་ཆོས་ཀྱིས་ནི་འདི་གལ་ཆེན་དང་དོན་ཆེན་པོ་ཡོད་པ་ཞིག་ཏུ་རྩི་གི་རེད་ལ། སངས་རྒྱས་ཤཱཀྱ་ཐུབ་པས་ཀྱང་དེ་ག་རང་དགོས་པར་གསུངས་ཡོད།
ཡིན་ན་ཡང། ང་ཚོས་འདི་དག་ལ་བསམ་བློ་གང་ཡང་མི་གཏོང་བས་རང་གི་རང་ལ་ཡི་ཆད་དགོས་པ་མང་པོ་ཡོང་གི་ཡོད། དཔེར་ན། རྒྱལ་ཕྱི་ནང་ཀུན་ན་འཇིག་རྟེན་གྱི་བྱ་བ་རེ་རེའི་ཆེད་དུ་རང་གི་ལུས་ལ་མེ་སྦོར་མཁན་དང་། ཡང་ཉི་མ་བཅུ་བཞི་བཅོ་ལྔ་རེ་ལ་ཆུ་ཁ་ལ་མི་རེག་པར་ཟས་བཅད་ནས་འདུག་པ་སོགས་རང་སྲོག་བློས་གཏོང་བྱེད་མཁན་མང་པོ་ཡོད་ན་ཡང་། ང་ཚོས་ཆོས་ཀྱི་ཐོག་ལ་རང་ལུས་མེ་ལ་སྒྲོན་པ་ལྟ་བུའི་སྡུག་དཀའ་ལས་བརྒྱབ་ནས་ཆོས་སྤེལ་བ་ལྟ་ཅི། མ་མཐའ་ཉི་མ་གཅིག་ལ་གུང་ཚིགས་ཙམ་ཡང་མི་མོས་པར་རང་རང་སོ་སོའི་ཟ་གོན་དང་སྒོར་མོ་གང་ནས་རག་ན་དེའི་ཕྱོགས་སུ་རྒྱུག་རྒྱུ་མ་གཏོགས་མེད་པ་རེད།ང་རང་ལ་མཚོན་ན་ཕར་ལྟར་སྣང་ལ་ལས་ཀ་ཅུང་ཟད་རེ་བྱས་ན་ཡང་དོན་ངོ་མར་འཇིག་རྟེན་པ་རྣམས་ཀྱིས་འཇིག་རྟེན་གྱི་ཆེད་དུ་བྱས་པ་དག་གི་ཕྱེད་ཀ་ཙམ་ཡང་བྱས་མེད་པ་དེ་འདྲ་ཞིག་རེད།གཅིག་བྱས་ན་ཁྱེད་རྣམ་པས་བྱས་ཡོད་ཀྱི་རེད་དེ། དེ་ཡང་དྲང་མོ་བཤད་ན་རིག་ས་གོ་ས་ན་ནི་ཆེན་པོ་ཞིག་མི་འདུག དེས་ན་འཇིག་རྟེན་པ་དག་གི་བྱེད་སྟངས་དང་ཕྱི་རོལ་པས་ཆོས་སྤེལ་སྟངས་སོགས་དང་བསྡུར་བ་ཡིན་ན་ཡང་། ཁར་རྩང་དེ་རིང་བོད་པས་ཆོས་བྱེད་སྟངས་དེ་ཆོས་རེད་དམ་འཇིག་རྟེན་རེད། འཇིག་རྟེན་གྱི་ནང་ནས་ཀྱང་དེང་སང་གི་དམངས་གཙོའི་འགྲོ་སྟངས་ལྟ་བུ་ཞིག་དང་བསྡུར་བ་ཡིན་ན་དེ་བས་ཀྱང་ང་ཚོའི་བྱེད་སྟངས་ནི་བཀས་བཀོད་རྒྱུན་འཛིན་ལམ་ལུགས་ཟེར་བའི་རྒྱལ་པོའི་ལམ་ལུགས་རྙིང་པ་དེ་འདྲ་ཞིག་མ་རེད་དམ་སྙམ་པ་དང། མ་མཐའ་ཡང་བརྒྱ་ཆ་ལྔ་བཅུ་དྲུག་ཅུ་ཞིག་འདི་འདྲ་ཞིག་ཆགས་འདུག་སྙམ་པ་ལྟ་བུ་ཞིག་རེད། འོན་ཀྱང་དེ་དག་ཡོང་རྫོགས་མི་སྒེར་གྱི་སྤྱོད་པས་ལན་པ་རེད། སངས་རྒྱས་ཀྱི་བསྟན་པའི་ནང་དུ་བཙན་དབང་དང་གཉའ་གནོན་བཤུ་གཞོག་ལ་སོགས་པ་ཡོད་པ་མ་རེད། སྔོན་ཆད་ཚིག་འདི་དག་བེད་སྤྱོད་བྱས་ནས་ཆོས་ལུགས་པ་ཡོངས་རྫོགས་གཉའ་གནོན་གཤུ་བཞོག་པ་རེད་ཅེས་བཤད་དྲགས་པས་ལོ་ལོན་དག་གི་རྣ་བར་སྙན་པོ་ཞིག་མིན་ན་ཐང་མོད། འོན་ཀྱང་ཚིག་འདི་དག་འཛམ་བུ་གླིང་གིས་བེད་སྤྱོད་བྱེད་ཀྱིན་ཡོད་པས་ང་ཚོས་ཀྱང་བེད་སྤྱོད་བྱེད་ས་ཞིག་ལ་ངེས་པར་དུ་བྱེད་དགོས།
དཔེ་ཞིག་བཞག་ན། སྐྱེས་པ་དག་གིས་གཡག་རྒན་རྣམས་ལ། ཁལ་འགེལ་དུས་ཁལ་འགེལ། ཞིང་རྨོད་དུས་ཞིང་རྨོད་པ་ལྟ་བུ་ལ་གཉའ་གནོན་དང་། བུད་མེད་དག་གིས་བེའུ་དག་ལ་ཁོ་རང་གི་སྐལ་བའི་འོ་མ་ཡང་ནུ་མི་འཇུག། རྟོལ་ལེ་དག་ཀྱང་ཆུང་ཆུང་ནས་མ་འོ་ཁ་ལ་རེག་མི་འཇུག་པར་གསོད། ལུག་གུ་དག་ཀྱང་ཆེ་རུ་མི་འཇུག་པ་སོགས་དེ་དང་དེ་འདྲ་བའི་རིགས་ལ་བཤུ་གཞོག་ཟེར་གྱི་ཡོད་པ་རེད། དེས་ན་གཉའ་གནོན་དང་བཤུ་གཞོག་ཟེར་བ་འདི་རིགས་རྒྱལ་ཁབ་ཀྱི་ངོས་ནས་མི་རུང་བ་ཞིག་ཡིན་པ་ཙམ་མིན་པར་ཆོས་པ་རྣམས་ཀྱི་ངོས་ནས་དེ་བས་ཀྱང་མི་རུང་བ་ཞིག་རེད། ཐ་སྙད་བེད་སྤྱོད་བྱེད་སྟངས་ཙམ་ཡང་དུས་རབས་དང་མཐུན་པ་ཞིག་མ་བྱུང་ན་ལམ་ལོག་པ་ཞིག་ཏུ་འགྲོ་གི་རེད་ལ། དེ་ལྟ་བུ་དེ་དངོས་ཡོད་ཀྱི་འཛམ་བུ་གླིང་དང་ཡང་ཐ་དད་དུ་འགྱུར་གྱི་རེད། དེས་ན་དགོན་པ་དག་གིས་ཀྱང་མང་ཚོགས་ཀྱི་ནང་དུ་བྱ་བ་སྒྲུབ་དགོས།འོན་ཀྱང་བྱ་བ་དེ་ཡང་ཕུག་རང་དོན་ཡིན་པ་ཞིག་མིན་པར་སངས་རྒྱས་ཉིད་ཀྱིས་སེམས་ཅན་ཐམས་ཅད་ལ་ཕན་པ་སྒྲུབ་དགོས་གསུངས་པ་ལྟར་བྱ་དགོས།
གོང་དུ་བཤད་པ་ལྟར་ཕྱི་རོལ་པ་ལྟ་བུ་ཞིག་ཡིན་ན་སོ་སོའི་ཆོས་ལུགས་སྤེལ་བའི་ཆེད་དུ་སེམས་ཁུལ་ཆེན་པོ་བྱེད་ཅིང། དེའི་སྟབས་ཀྱི་འཛམ་བུ་གླིང་དུ་ཡང་ཕྱི་རོལ་པའི་ཆོས་པ་ཅི་ཙམ་དུ་མང་པོ་འདུག ང་ཚོ་བོད་ཀྱི་ཆོས་འདི་ལ་མཚོན་ན་ཡང་ཡག་པོ་ཞིག་སྤེལ་བ་ཡིན་ན་ཤིན་ཏུ་རྒྱ་ཆེན་པོ་སྤེལ་ཆོག་པ་རེད་དེ། དེ་འདྲ་ལ་བསམ་བློ་མི་གཏོང་བར་སྒོར་མོ་ག་ཚད་ཅིག་རག་བསམས་ནས་བསྡད་ཡོད་པ་རེད། ཆོས་ཆེན་པོ་ཞིག་སྤེལ་བསམ་པ་ཡོད་མཁན་ཞིག་ཡིན་ན་ནི་རྒྱ་ནག་ཙམ་མ་ཟད་ཅི་ལྟ་བུའི་མཐའ་འཁོབ་ཀླ་ཀློ་ཞིག་ཏུ་ཡིན་ན་ཡང་འགྲོ་དགོས་པ་རེད་ལ། སངས་རྒྱས་ཀྱི་ཆོས་ཀྱིས་སུ་ལ་ཕན་ཐོགས་ན་སུ་ཡིན་པས་ངེས་པར་དུ་སྤེལ་དགོས་པ་རེད། འོན་ཀྱང་ང་ཚོ་ལ་དེ་ལྟ་བུའི་བསམ་པ་ཡོད་པ་མ་རེད། དངོས་གནས་རང་འདོད་སྤུའི་རྩེ་མོ་ཙམ་ཡང་མེད་པར་ཆོས་སྤེལ་མཁན་ཞིག་ཡིན་ན་གཞན་པ་ཞིག་ལ་གོ་བརྡ་འཕྲོད་མི་འཕྲོད་མི་དགོས་པར་བོད་ཀྱི་མི་སྐྱ་ཕོ་མོ་དག་ལ་ཆོས་ཀྱི་གོ་བརྡ་སྤྲད་ན་འཕྲོད་ཤག་ཤག་རེད་དེ་དེ་ཡང་མི་བྱེད་པ་རེད།དེ་འདྲ་དེས་རྒྱ་ཡུལ་ལྟ་བུ་ག་ཤེད་ཅིག་ནས་ཆོས་སྤེལ་འདོག་འདོག་བྱས་ན་ཡང་དེ་ཤོབ་ཡིན་རྒྱུ་རེད།གལ་ཏེ་བདེན་ན་དང་པོ་བོད་ཡུལ་རང་གི་ས་ཆ་སྡུག་ས་དང་ཟ་རྒྱུ་གོན་རྒྱུ་མེད་ས། སྡུག་དཀའ་ལས་ཚོར་ས།རྙེད་པ་མེད་ས་དག་ཏུ་སོང་ནས་སྤེལ། དེ་ནས་རྒྱ་ཡུལ་སོགས་སུ་སྤེལ་ན་བདེན་པ་ཡིན་པའི་རྟགས་ཡིན།གཞན་གྲོང་ཁྱེར་སྐྱིད་ས་དང་། སྒོར་མོ་རག་ས་ཞིག་ནས་ཆོས་སྤེལ་གྱིན་ཡོད་ཅེས་ལབ་ན་ཡང་སུས་ཡིད་ཆེས་ཀྱི་མ་རེད།
འདི་དག་ལག་ལེན་ལ་རང་གཞན་སུས་ཀྱང་ཐེབས་དཀའ་ན་ཡང་། གང་ལྟར་རིགས་པའི་གཞུང་ལུགས་ཀྱི་ངོས་ནས་ནི་དེ་འདྲ་ཞིག་རེད། དེས་ན་རིགས་པའི་གཞུང་ལུགས་ཟེར་བ་དེ་ཕྱོགས་གཅིག་རེད་ལ། ལག་བསྟར་ཟེར་བ་དེ་རིགས་པའི་གཞུང་ལུགས་ཀྱི་རྗེས་ཨེ་ཆོད་ལྟ་བ་དེ་རེད། ཁྱེད་ཅག་གིས་དཔེ་ཆ་ལྟས་ནས་ལུང་དང་རིགས་པས་བརྡར་ཤ་བཅད་ནས་བསྡད་པས་གཤམ་འོག་གི་གནས་ཚུལ་མང་པོ་ཞིག་ཧ་མི་གོ་ན་ཡང་། ངས་དེ་ལྟར་མ་བྱས་པར་འོག་ལ་འཁྱམས་ཕྱིན་པས་དཔེ་ཆ་བརྗེད་ཚར་ཡང་མི་སྐྱ་ཕོ་མོ་དག་གིས་ཅི་ཞིག་ཟེར་གྱིན་ཡོད་པ་དེ་གོ་ཡོད་པ་རེད།
མཁས་དབང་ཚུལ་ཁྲིམས་བློ་གྲོས་ཀྱི་བཀའ་སློབ། ཕབ་སྒྲིག་པ་རྫ་ཚེ་རིང་བཀྲ་ཤིས། མུར་འགོད།
