日期: 2012-03-28
来自: གངས་བུ་རྩེ་རྒྱལ།
主题: དུས་ཐོག་ཆར་བ། ༤༤
ཀིརྟི་དགོན་པའི་ཤུགས་རྐྱེན།
གལ་ཏེ་དགོན་དཔོན་གོ་བ་ཅན་ཞིག་ཡིན་ན་ལས་ལུགས་བཅའ་སྟངས་མེད་པའང་མ་རེད། དཔེར་ན།གསར་མའི་དགོན་པ་ཡིན་ལུགས་གཅིག་པ་རེད་དེ། ཀིརྟི་སང་ལྟ་བུར་སྔོན་ཆད་ཚོགས་ཤ་འདྲེན་པ་སོགས་ཀྱི་ལུགས་སྲོལ་ཡོད་ན་ཡང། ད་ལྟ་བླ་མ་གཅིག་གི་སྟོབས་ཀྱིས་ཅི་འདྲ་བྱས་འདུག དེའི་ཤུགས་རྐྱེན་གྱིས་ད་ལྟ་ས་ཕྱོགས་མང་པོར་ཡང་གནས་སྟངས་ཅུང་ཟད་ཡག་ཏུ་འགྲོ་བཞིན་ཡོད་ན་ཡང་། ད་དུང་གཞན་པ་ཁ་ཤས་སྔར་བཞིན་བསྡད་ཡོད་པ་རེད། དགོན་པ་མང་པོ་ཞིག་ལ་ལྷ་སྡེ་ཆེན་པོ་དང་ལ་ལར་ལྷ་སྡེ་ཆུང་ཆུང་ཡོད་ས་ཡང་འདུག་སྟེ། ཕལ་མོ་ཆེ་གནའི་བཀས་བཀོད་རྒྱུན་འཛིན་པ་དང་དབང་སྒྱུར་བས་མི་སེར་སྤེལ་ཡུལ་གྱི་ལས་ཀ་བྱེད་པ་ལྟ་བུ་ལས་སངས་རྒྱས་ཀྱི་ཆོས་ལུགས་ཀྱི་དྲི་ཙམ་ཡང་མི་བྲོ་བ་འདུག ཡང་དགོན་པ་གཅིག་གིས་དགོན་པ་གཞན་ཞིག་ངའི་དགོན་ལག་ཡིན་ཟེར་བའི་སྐབས་སུ་དགོན་པ་གཞན་དེས་ངེད་སང་གནའ་ནས་དགོན་པ་རང་སྐྱ་བ་ཞིག་ཡིན་ཟེར་ནས་ཐོབ་ཐང་རྩོད་ལེན་ལྟ་བུའི་སྐད་ཆ་ཤོད་ཀྱི་ཡོད། ཁྱེད་ཚོས་རྒྱལ་ཁབ་ཀྱི་བཤད་སྟངས་རེད་བསམ་ན་ཆོག་ལ་མ་བསམ་ན་ཡང་ཆོག་མོད། སངས་རྒྱས་ཀྱི་བསྟན་པའི་དབང་དུ་བྱས་ན། མི་སྒེར་ལ་ཆོས་བརྒྱད་མེད་པ་དཀའ་ན་ཡང་། བསྟན་དགོན་ཆེན་པོ་དག་གི་ནང་ན་ཡང་ཆོས་བརྒྱད་ཀྱི་ནང་ནས་ཀྱང་ཆོས་བརྒྱད་རགས་པ། ཆབ་སྲིད་པ་ཆེན་པོ་དག་གི་ལས་སྟངས་བྱས་ནས་བསྡད་ཡོད་མཁན་དག་ལ་བསམ་བློ་གཏོང་དུས། ཆེ་ཆུང་ཙམ་གྱི་ཁྱད་པར་མ་གཏོགས་གནའ་དབྱིན་ཇི་སོགས་ཀྱིས་འཛམ་གླིང་ལ་གང་བྱས་པ་དག་དང་བྱེད་སྟངས་གཅིག་པ་རེད་སྙམ་པ་འདུག དེ་ལྟར་ཞིབ་ཏུ་བལྟས་ན་དགོན་པ་ལ་ལར་ཆབ་སྲིད་ཤིན་ཏུ་གཏིང་ཟབ་པོ་རེད། འོན་ཀྱང་འདིའི་མིང་ལ་ཆབ་སྲིད་ཟེར་རྒྱུ་མེད།རྒྱ་སྐད་དུ་བསྒྱུར་ན་དེ་བས་ཀྱང་གཙོག་ཏུ་འགྲོ་གི་རེད། དེས་ན་འདི་རིགས་ལ་འཇིག་རྟེན་ཆོས་བརྒྱད་ཟེར་དགོས། ཆབ་སྲིད་པ་དག་གིས་ཆོས་བརྒྱད་སྒྲུབ་ཀྱི་ཡོད་པ་ལྟར་ཁོང་ཚོས་ཀྱང་བྱེད་ཀྱི་འདུག ཁྱེད་རྣམ་པ་ཡང་ཕལ་མོ་ཆེ་ཕྱིས་སོ་སོའི་དགོན་པར་མཁན་པོ་ལྟ་བུ་བྱེད་རྒྱུ་རེད། དེའི་སྐབས་སུ་ཡིན་ན་ཡང་སངས་རྒྱས་ཀྱི་བསྟན་པ་ལ་གནོད་པའི་དགོན་པ་དེ་ལྟ་བུ་མེད་ན་དགའ་བ་ཞིག་ཡིན་པ་ཐུགས་ལ་འཛིན་དགོས།དཔལ་མགོན་འཕགས་པ་ཀླུ་སྒྲུབ་གྱིས་མདོ་ལས་ཁོལ་བྱུང་མཛད་པར་གསུངས་པ་ཇོ་བོ་རྗེའི་ཆོས་ཚན་བརྒྱ་རྩའི་ནང་དུ་བཞག་ཡོད་པའི་ལུང་ཚན་བཀོད་དེའི་ནང་དུ་ཡང་། སེམས་ཅན་ལ་མི་གནོད་པ་དང་། སེམས་ཅན་ལ་ཕན་པའི་སྙིང་རྗེ་ཁོ་ན་སངས་རྒྱས་ཀྱི་བསྟན་པ་ཡིན་ཞེས་གསུངས་ཡོད་པ་རེད། འོན་ཀྱང་དེང་སང་བཀའ་འགྱུར་གྱི་ཁྲོད་དུ་མདོ་དེ་མི་བཞུགས།
དེ་ལྟར་ན། དེང་སང་དགོན་པ་ཆེན་པོ་རེ་རེ་ལ་བླ་བྲང་ཆེན་པོ་ཁ་ཤས་ཡོད་པ་དང་། དེ་དག་གིས་ཀྱང་གཅིག་ལས་གཅིག་སྟོབས་སུ་ཆེ་ལྟ་ཞིང་། དགོན་པ་འགའ་རེའི་ནང་དུ་སྤྲུལ་སྐུ་མང་པོ་ངོས་འཛིན་བྱས་ནས་སྤྲུལ་སྐུ་ཚོས་ལྷ་ཁང་སུ་ཆེ་འགྲན་སྡུར་བྱས་ནས་བསྡད་ཡོད་ན་ཡང་། དེ་དག་ལ་བརྟེན་ནས་འཇིག་རྟེན་ཆོས་བརྒྱད་རེ་འགྲུབ་ན་མ་གཏོགས་ཆོས་ཤིག་འགྲུབ་ཀྱི་མ་རེད་ལ། བར་སྐབས་ཤིག་ནས་འཇིག་རྟེན་ཆོས་བརྒྱད་ཀྱང་འགྲུབ་ཀྱི་མ་རེད། དེའི་རྒྱུ་མཚན། ཁོང་ཚོས་འཛམ་བུ་གླིང་གི་ལས་སྟངས་དང་འགྲོ་ཕྱོགས་ཧ་གོ་གི་མེད་པས་རེད། དེ་བཞིན་བོད་པས་ད་དུང་འཛམ་གླིང་གི་འགྲོ་སྟངས་ཆེན་པོ་མི་གོ་ན་ཡང་སྔར་དང་ད་ལྟ་མི་འདྲ་བ་བཞིན་རིམ་གྱིས་ཧ་གོ་ཡོང་གི་རེད།
དྲང་བདེན་གྱི་འཚོ་ཐབས།
ང་ཚོས་མི་མང་ལ་བཤས་ཚོང་མ་རྒྱག་ཅེས་བཤད་པར་རྒྱུ་མཚན་ཡོད། དེ་ཡང་ངས་བསམ་ན། ང་ཚོ་དཔལ་འབྱོར་ཡར་རྒྱས་མེད་པ་དང་དཔལ་འབྱོར་མཐའ་བརྡིབས་ནས་བྱ་ཐབས་མེད་པ་ཆགས་སྤྱད་ཀྱི་འགག་རྩ་ངོ་མ་དེ་བཤས་ཚོང་ལ་འགོ་འཁོར་བཅུག་ནས་རིག་གནས་ལག་རྩལ་སོགས་འཚོ་ཐབས་གཞན་སློབ་པར་སྐུལ་འདེད་མ་བྱས་ཤིང་དེའི་ཕྱོགས་ལ་བསམ་བློ་གཏོང་དུ་མ་བཅུག་པས་རེད། ལས་ཀ་ལས་སྟངས་འདིར་ང་ཚོས་དོགས་པ་སློང་དགོས་ཤིང་། དཔལ་འབྱོར་ཡར་རྒྱས་མི་འགྲོ་བའི་རྩ་བའི་གནད་འགག་གཅིག་འདི་ལ་ཐུག་ཡོད་པ་དེ་ཚང་མས་ཧ་གོ་དགོས། དེ་ངའི་བསམ་བློ་དང་ལྟ་གྲུབ་ཡིན། གལ་ཏེ་གཞན་ལ་དེ་ལྟར་མིན་པའི་རྒྱུ་མཚན་ཞིག་བཤད་རྒྱུ་ཡོད་ན་དེ་རེད། མེད་ན་ཨུ་ཚུགས་བྱ་རྒྱུ་གང་ཡང་ལྷག་མེད།
དེ་ཡང་འབྲོག་པ་ཞིག་ལ་མཚོན་ན་ཕའི་རིང་ལ་བཤས་ཚོང་ལས་ཅི་ཡང་མ་ཤེས། བུའི་རིང་ལ་ཡང་དེ་ལས་མ་ཤེས། བུའི་བུའི་རིང་ལ་ཡང་བཤས་ཚོང་རྒྱག་རྒྱུ་ལས་ཅི་ཡང་མི་ཤེས་པ་ཡིན་ན་སྒོ་རྩ་ན་གཤས་ཚོང་གི་མ་རྩ་ཅི་ཙམ་འདུག འབྲོག་པ་ཧ་ཅང་ཕྱུག་པོའི་གྲས་ཤིག་ཡིན་ན་ཡང་ཟོག་མནག་སུམ་བརྒྱ་ཡར་མར་རེ་ལས་ཨེ་ཡོད་མི་ཤེས། ཟོག་གནག་སུམ་བརྒྱ་ཟེར་ན་དོས་སྐྱེལ་རླངས་འཁོར་བཅུ་ཐམ་པ་རེད། དེ་ཡང་ཟོང་འཁོར་ཆེ་གྲས་ཤིག་ཏུ་ཟོག་སུམ་ཅུ་ཤོང་གི་རེད།
ལོ་གཅིག་གིས་རླངས་འཁོར་བཅུ་པོ་ཡོངས་རྫོགས་བཙོངས་ཟིན་པའམ། དེ་མིན་ཡང་ལོ་གཉིས་ཀྱི་ནང་ལ་ད་ལོ་རླངས་འཁོར་ལྔ་དང་། ལོ་རྗེས་མར་རླངས་འཁོར་ལྔ་བཙོངས་པ་ཡིན་ན་དེ་ནས་རྔ་མ་བུད་ཚར་བ་རེད།ཉག་རོང་ལུང་པའི་ནང་གི་ཤིང་ནགས་གཅིག་པུ་ལ་བསམ་བློ་བཏང་ན་ཡང་ཅི་འདྲའི་གཞི་རྒྱ་ཆེན་པོ་ཡོད་པ་རེད་དེ། རྒྱལ་ཁབ་ཀྱིས་ཡུན་རིང་པོར་བཅད་ནས་མཐར་འབྲི་ཆུའི་སྨད་རྒྱུད་ལ་ཆུ་ལོག་རྒྱུགས་ཏེ་མི་རྣམས་རྩ་བ་ནས་འདུག་མ་བཅུག་པའི་དབང་གིས་ད་ལྟ་སྒེར་གྱི་ཁང་ཤིང་ཙམ་ཡང་གཅོད་མི་ཆོག་པ་བཟོས་ཡོད་པ་ཡང་ཤིང་ནགས་ཟད་སོང་བའི་དབང་གིས་རེད། ཤིང་ནགས་ཀྱང་དེ་ལྟར་ཟད་ནས་འགྲོ་བ་ཡིན་ན་འབྲོག་པའི་སྒོ་རྩ་ན་ཡོད་པའི་ཕྱུགས་ཟོག་ཉུང་ཉུང་དེ་དག་དེ་བས་ཀྱང་ད་ལྟ་ད་ལྟ་ཟད་འགྲོ་གི་རེད།
འོ་ན་ང་ཚོར་འཕེལ་རྒྱས་དགོས་སམ་མི་དགོས་ཟེར་ན། ང་ཚོ་བནྡེ་དག་གིས་ཀྱང་བོད་ཀྱི་ཁྱིམ་ཚང་དག་ལ་དཔལ་འབྱོར་ཡར་རྒྱས་སུ་གཏོང་དགོས་ཟེར་བ་ལས་མི་དགོས་ཟེར་རྒྱུ་མེད། འོན་ཀྱང་ཡར་རྒྱས་གཏོང་སྟངས་དེ་བཤས་ཚོང་གི་འཚོ་ཐབས་མིན་པ་གསལ་པོ་བྱེད་དགོས།
དེང་སང་འཛམ་བུ་གླིང་གིས་རྒྱུན་སྲིང་གི་འཕེལ་རྒྱས་ཟེར་བ་ཞིག་བཤད་ཀྱི་ཡོད་ཅིང་། དེ་ཚོ་ཚང་མས་ཡང་ནས་ཡང་དུ་ཡུན་རིང་པོའི་བར་དུ་རྒྱུན་བསྲིངས་ནས་འཕེལ་རྒྱས་འགྲོ་ཐུབ་པ་དེ་འདྲ་ཞིག་ལ་བསམ་བློ་བཏང་གིན་ཡོད་པ་རེད། འོན་ཀྱང་བཤས་ཚོང་འདི་རིགས་ལ་རྒྱུན་བསྲིང་མི་ཐུབ་པའི་ཕེལ་རྒྱས་ཟེར་བ་རེད།དེས་ན་ད་ནས་རབ་ན་རིག་གནས་སྦྱོང་། དེ་མིན་ན་ལོ་བཞི་བཅུ་མན་ཆད་ཀྱིས་ལག་རྩལ་སྦྱོང་། དེ་ཡང་མ་འཇོན་ན་ངལ་རྩོལ་བྱས་ནས་ཁ་གསོ་བ་འདི་རྒྱུན་བསྲིངས་ཐུབ་པའི་འཕེལ་རྒྱས་རེད། དེས་ན་ཚང་མས་བསམ་ལུགས་དང་བཤད་ལུགས་ལས་ལུགས་ངོ་མ་གང་ཡིན་དེ་གོ་དགོས།
དེ་ཡང་། བོད་ཀྱི་མགར་དང་ཚེམས་གྲུབ་ཤིང་བཟོ་སོགས་སྦྱོང་དགོས། ཆུང་ས་ནས་བཤད་ན་ཉག་རོང་ལྟ་བུའི་ཤིང་ཆ་མོད་ས་ཞིག་ལ་མཚོན་ན་ཤིང་གི་རྩ་བ་སྐམ་ཟིན་པའི་འཛེར་ཐོ་འདི་དག་གིས་ཅ་ནེ་འཇོག་ས་དང་དབྱིབས་གཟུགས་འདྲ་མིན་བརྐོ་གཞོག་བྱས་ནས་བཙོང་པ་ཡིན་ན་ཡང་མི་མང་པོ་ཞིག་གི་ཁ་སོས་ཐུབ།རྒྱ་ཡུལ་དུ་མི་མང་པོ་ཞིག་གི་འཚོ་བ་འདི་འདྲ་ལ་བརྟེན་ཡོད་པ་རེད།
མདོར་ན་ད་ནས་ང་ཚོས་ཤེས་རིག་དང་ལག་རྩལ་གྱིས་ཁ་གསོ་བ་ལས་ཞིང་ཁའི་ནང་དུ་ཚེར་མ་བཏབ། སྒོ་ཕྱུགས་ཚང་མ་བཤས་ཚོང་བྱས། རིག་གནས་དང་ལག་རྩལ་གང་ཡང་མ་བསླབས་པ་ཡིན་ན་ནམ་ཞིག་སྒོ་ཕྱུགས་དག་ཟད་པ་དང་མི་གེའི་འཆི་རྒྱུ་མ་གཏོགས་མེད། ཕར་ཐད་ཀར་ལྟས་ན་བཤས་ཚོང་ཞིག་བརྒྱབ་པ་ཡིན་ན་དེ་མ་ཐག་སྒོར་མོ་ཁྲི་ཁ་ཤས་རག་གི་རེད་དེ། ཕུགས་ལ་ལག་རྩལ་སྦྱངས་ནས་ལས་ཀ་ལས་ན་དེ་ཕན་ཐོགས་ཆེ། དེ་ཡང་ང་ཚོ་བོད་པ་ལྟ་བུ་ས་རྒྱ་ཆེན་པོ། མི་ཉུང་ཉུང། གཏེར་ཁ་དང་ཐོན་ཁུངས་རྒྱ་ཆེན་པོ་ཡོད་པའི་མི་རིགས་ཤིག་གིས་བཤས་ཚོང་ཞིག་རྩ་བ་ནས་རྒྱག་དགོས་དོན་ཡོད་པ་མ་རེད། གོང་དུ་བཤད་པ་ལྟར་ཐ་ན་ཤིང་གི་འཛེར་ཐོ་རྐྱང་པ་བརྐོ་བཞོག་བྱས་བསྡད་ན་ཡང་ཁ་སོས་འགྲོ་གི་རེད།
ལག་རྩལ་གཞན་མ་ཤེས་ཀྱང་རྡོ་རྩིག་རྩིག་རྒྱུ། གྱང་རྡུང་རྒྱུ་སོགས་དང་། དེ་མིན་ལམ་ལས་ས་སོགས་སུ་ཨར་འདམ་གྱི་ལས་ཀ་མང་པོ་ཡོད་རེད་ལ་ཨར་འདམ་གྱི་ལས་ཀ་ལས་རྒྱུ་འདི་དག་ལ་མི་ཤེས་རྒྱུ་ཞིག་རྩ་བ་ནས་མེད་ན་ཡང་། ད་ལྟ་ང་ཚོར་མཚོན་ན་འདི་དག་ཚང་མ་རྒྱ་རིགས་ཀྱིས་ལས་ཀྱིན་ཡོད་པ་རེད། དེ་ཡང་རྒྱ་རིགས་ཤིག་གིས་ལས་ན་ཉིན་གླ་སྒོར་མོ་བརྒྱ་དང་བཞི་བཅུ་ལྔ་བཅུ་དགོས་པ་དང་། བོད་པ་ཞིག་གིས་ལས་ན་སྒོར་མོ་ལྔ་བཅུ་དྲུག་བཅུ་ལས་མི་ལོན་པ་རེད། ལས་ཀ་ལས་དགོས་པ་འདྲ་འདྲ་ཡིན་བཞིན་གོང་ཆེ་ཤོས་ལོན་ན་དེར་མི་དགའ་མཁན་སུ་ཡོད། ཁང་པ་ཞིག་ལས་དགོས་ན་ཡང་ཇུས་འགོད་བྱེད་རྒྱུ་སོགས་ལག་ཤེས་ཅུང་དཀའ་མོའི་རིགས་དེ་དག་ནི་རྒྱ་རིགས་ལས་བཟོ་བ་དེ་དག་གིས་ཀྱང་མང་ཆེ་བས་ཤེས་ཀྱི་མེད་པར་གཞན་ཞིག་གི་ཇུས་འགོད་ཟིན་པའི་རི་མོར་ལྟས་ནས་ལས་ཀྱིན་ཡོད་པ་ལས་དེའི་ནང་ན་ཤེས་མཁན་གཅིག་གཉིས་རེ་ལས་ཡོད་པ་མ་རེད།
དེ་བཞིན་གསེར་རྟ་ལྟ་བུར་མཚོན་ན་མཛུབ་མོ་ལ་སྐོན་རྒྱུའི་འཛུབ་དཀྲིས་ཐེབས་ཆག་ཅིག་ཡིན་ན་ཡང་བོད་པ་མགར་མཁན་མེད་པར་ཡུན་ནན་ནས་ཡོང་བའི་རྒྱ་རིགས་རྐྱང་པས་མགར་གྱིན་ཡོད་པ་རེད། ལྷ་སར་མཚོན་ན་ཡང་ཁྲོམ་བར་ན་མགར་བྱེད་གྱིན་ཡོད་པ་ཡོངས་རྫོགས་རྒྱ་ཁོ་ན་རེད། དེ་བཞིན་ཁྲིན་ཏུ་ན་ཡོད་པའི་བོད་ཀྱི་ས་གདན་ལས་སར་མཚོན་ན་ཉི་མ་རེ་རེ་བཞིན་ས་གདན་ཟོང་འཁོར་དོས་སྐྱེལ་རླངས་འཁོར་གྱི་ཐ་སྙད་གསར་པ ཧ་ཅང་མང་པོ་སྐྱེལ་འདྲེན་བྱེད་གྱིན་ཡོད་པར་མ་ཟད། བོད་ཀྱི་ཅ་ལག་ཡིན་པས་དར་རྩེ་མདོ་དང་འབར་ཁམས་ལྟ་བུ་བོད་ཀྱི་ས་གནས་ཞིག་གམ། ཐ་ན་ཉག་རོང་རྫོང་ནས་འཐག་བཞག་ན་ཡང་ཆོག་གི་རེད་དེ། ཚང་མ་རྒྱ་རིགས་ཁོ་ནས་འཐག་གིན་ཡོད་པ་དང་། བོད་ཀྱི་སྤོས་ཀྱང་། དང་པོ་བོད་ཀྱིས་ལས་ཁུལ་བྱས་ན་ཡང་ད་ལྟ་རྒྱ་རིགས་ཁོ་ནས་ལས་ཀྱིན་ཡོད་པ་འདི་རེད། དེས་ན་འདི་རིགས་ཀྱི་ཐོག་ལ་བསམ་བློ་བཏང་ནས་འདི་དག་ལ་སློབ་སྦྱོང་མ་བྱས་ན་དཔལ་འབྱོར་ཡར་རྒྱས་འགྲོ་གི་མ་རེད་མི་ཟེར་བར་ཡིན་གཅིག་མིན་གཉིས་བཤས་མ་བཤས་ན་དཔལ་འབྱོར་ཡར་རྒྱས་འགྲོ་གི་མ་རེད་ཟེར་དགོས་པའི་རྒྱུ་མཚན་ཅི་རེད།ངས་བསམ་ན་སྐད་ཆ་འདི་ནོར་བ་རེད། གལ་ཏེ་དེ་ལྟར་སློབ་མཁན་ཞིག་ཡོད་ན་དེ་བསམ་ནག་གི་བསླབ་བྱ་ཞིག་གམ་བསམ་པ་ཕྱིན་ཅི་ལོག་གི་བསླབ་བྱ་ཞིག་རེད།
དེས་ན་བོད་ཀྱི་འཚོ་བ་སྐྱེལ་སྟངས་ཀྱང་ད་ཕན་ཆོད་བཤས་ཚོང་རྒྱག་རྒྱུ་མིན། དཔལ་འབྱོར་ཡར་རྒྱས་ལ་འགྲོ་རྒྱུ་ཡིན་ཞེས་པའི་སློབ་གསོ་འདི་གཏོང་དགོས། འདི་ཧ་ཅང་གལ་ཆེན་ཡིན།
འོན་ཀྱང་། ང་ཚོས་ཁྲིམས་བཞག་ནས་འདི་ཆོག་དང་མི་ཆོག་ཟེར་རྒྱུ་མེད། རྒྱལ་ཁབ་ཀྱིས་ཀྱང་བཤས་ཟོག་མ་བཤའ་ཟེར་ནས་བསླབ་བྱ་རྒྱག་ཆོག་ཀྱང་བཤའ་མི་ཆོག་ཟེར་ནས་ཁྲིམས་འཇོག་མི་ཆོག་ཟེར་གྱི་ཡོད་པ་ཡིན་དུས་སློབ་གསོ་སྤྲོད་རྒྱུ་ཙམ་ང་ཚོའི་འོས་འགན་རེད།
མཁས་དབང་ཚུལ་ཁྲིམས་བློ་གྲོས་ཀྱི་བཀའ་སློབ། ཕབ་སྒྲིག་པ་རྫ་ཚེ་རིང་བཀྲ་ཤིས། མུར་འགོད།
