日期: 2012-03-28
来自: གངས་བུ་རྩེ་རྒྱལ།
主题: དུས་ཐོག་ཆར་བ། ༣༡
རྫོགས་ཆེན་གྱིས་ཁོབ།
ལོ་ཉུང་རྣམ་པས་ཀྱང་དངོས་གནས་ལས་ཀ་ཞིག་བྱེད་བསམ་ན་ཁས་བཤད་རྒྱུ་དེ་ཉུང་དུ་བཏང་ནས་དོན་གྱི་ལག་ལེན་དེ་ལས་མ་བྱུང་ཡང་། དགོན་པའི་བན་ཆུང་རྣམས་ལ་སུམ་རྟགས་དག་གསུམ་དང་། སྙན་ངགསྐར་རྩིས་སོགས་ལ་ལེགས་པོ་ཞིག་བསླབས་པ་ཡིན་ན་དེ་བོད་ཀྱི་ཆོས་དང་འཇིག་རྟེན་གཉིས་ཀའི་དོན་ཞིག་རེད། དེས་ན་དཔེ་ཆ་ལོ་ཚོད་དང་བསྟུན་ནས་སྦྱོང་དགོས་པ་ཙམ་མ་ཟད་ཆུང་དུས་ནས་སུམ་རྟགས་འདི་རིགས་མ་སྦྱངས་ན་ཤིན་ཏུ་དཀའ་མོ་ཡོང་གི་རེད།
དཔེ་ཞིག་བཤད་ན། སྔོན་ཞིག་ལ་བནྡེ་ཁ་ཤས་ག་ཤེད་ཅིག་ལ་འགྲོ་ས་ནས་བུ་མོ་ལོ་ཆུང་ཆུང་ཅན་ཞིག་གིས་སུམ་རྟགས་ཀྱི་ནང་ནས་དྲི་བ་ཁ་ཤས་དྲིས་པར་བན་རྒན་གསུམ་ཡོད་པ་ཚང་མས་ལན་མ་ཐེབས།ཁོང་ཚོ་ངོ་ཚ་ནས་གཅིག་གིས། རྫོགས་ཆེན་གྱིས་ཁོབ། རྫོགས་ཆེན་གྱིས་ཁོབ།རྫོགས་ཆེན་གྱིས་ཁོབ་ཟེར་བ་ནི་རྫོགས་ཆེན་གྱི་གོ་བས་རྒྱས་འགེབ་བྱས་ནས་ལན་ཐོབ་ཟེར་བ་རེད་ཅེས་སྨྲས་པ་རེད་ཟེར།
ཁྱེད་ཚོས་བསམ་བློ་ཞིག་ཐོངས་དང་། སུམ་རྟགས་དག་གསུམ་རྫོགས་ཆེན་གྱིས་འགེབས་རྒྱུ་ག་ལ་ཡོད།གལ་ཏེ་ཡོད་སྲིད་ཀྱང་དེ་སློབ་ཆུང་སློབ་མ་ཞིག་གིས་ག་ལ་གོ ན་ཉིན་ཞིག་ལ་ཡང་སློབ་གྲྭའི་སློབ་མ་ཁ་ཤས་ཡོང་ནས་རིག་གནས་ཀྱི་ཐོག་ནས་དགོན་པ་ཞིག་གི་བཤད་གྲྭའི་བནྡེ་ཚང་མ་ཚར་བཅད་འདུག གྲྭ་པ་ཚོས་ཚད་མ་དང་ནང་དོན་རིག་པའི་ཐོག་ནས་རྩོད་གྲབས་བྱས་འདུག་སྟེ། ཁོང་ཚོས། ང་ཚོས་དེ་སྦྱངས་མེད།དགེ་རྒན་རྣམས་དང་རྩོད་ཟེར་ནས་རྩོད་རོགས་ཀྱང་མ་བྱས་པ་རེད་ཟེར། སློབ་སྦྱོང་མེད་ན་དེ་འདྲ་ཡོང་རྒྱུ་རེད།
མ་གཞི་རིག་གནས་ཟེར་བ་དེ་རིག་གནས་ཆེ་ཆུང་བཅུ་ལ་གོ་དགོས་པ་དང་། དེ་ལས་ཀྱང་ཕར་རྒྱ་ཆེ་ཙམ་བཤད་ན་རིག་གནས་མཐའ་དག་ཤེས་དགོས། འོན་ཀྱང་ང་ཚོས་ད་ལྟ་སྲོལ་རྒྱུན་ཙམ་མ་གཏོགས་གང་ཡང་ཤེས་ཀྱི་མེད་པ་རེད། དུས་སྐབས་འདིར་རང་བཞིན་གྱི་མི་ཞིག་ཡིན་ན་ཚན་རིག་ཀྱང་ངེས་པར་སྦྱོང་དགོས་པ་ཡིན་ན་ཡང་ང་ཚོ་གྲྭ་པ་དང་འབྲེལ་བ་ཆེན་པོ་ཡོད་མེད་དེ་ཙམ་རེད། གང་ལྟར་དགོན་པ་དག་ལ་མ་འོངས་པར་སློབ་སྟོན་བྱེད་པའི་འགན་གྲྭ་ས་ན་ཡོད་པ་རྣམས་ཀྱིས་ཁུར་དགོས་པ་ཡིན་དུས་འདི་ན་ཡོད་མཁན་གྱི་ལོ་ཆུང་རྣམས་ལ་མཚོན་ན་རིག་གནས་འཛིན་གྲྭའི་ནང་དུ་བཞག་སྟེ་དགེ་རྒན་རང་རང་སོ་སོས་འགན་ཁུར་ནས་སློབ་སྦྱོང་བྱེད་དུ་ཆུགཡང་བན་རྒན་འགའ་རེས་གྲྭ་ཆུང་རྣམས་སྒར་ལ་ཁྲིད་དེ་ཐོས་གྲོལ་ཚེ་སྒྲུབ་རེ་བསླབས་ནས་བསྡད་ཡོད་མཁན་ཡང་འདུག དེ་རྩ་བ་ནས་ནོར་བ་རེད། དེས་ན་དེ་དག་ཀྱང་རིག་གནས་འཛིན་གྲྭའི་ནང་དུ་བཅུག་སྟེ། ཚོམས་ཆུང་གི་དགེ་རྒན་རྣམས་ཀྱིས་ཡིག་ངོར་བརྒྱབ་ནས་རིག་གནས་འཛིན་གྲྭར་ཡོད་མེད་ཞིབ་གཤེར་བྱེད་དགོས། རྒྱལ་ཁབ་ཀྱིས་གྲྭ་པ་ཆུང་ཆུང་རྣམས་ཡོང་མི་ཆོག་ཟེར་ནས་རྣ་སྡིགས་ཅི་ཙམ་བྱས་ན་ཡང་རིག་གནས་རེ་སྦྱང་ན་བསམས་ནས་སྡོད་དུ་བཅུག་པ་རེད་དེ་སྦྱོང་དགོས་པ་དེ་མ་སྦྱངས་ན་ང་ཚོའི་རྣ་བ་ཚ་སྤྱད་རེད། དེ་བས་སོ་སོའི་ནང་ལ་སོང་ན་བཟང་གི་རེད།
དགོན་པའི་ནང་དུ་སློབ་གྲྭ་འཛུགས་པ་དང་ཆབ་གཅིག་རྒྱལ་ཁབ་ཀྱི་སློབ་གྲྭར་འགྲོ་རྒྱུར་ཡང་བནྡེ་རྣམས་ཀྱིས་ཕ་མ་སོགས་ལ་སྐུལ་སློང་བྱེད་དགོས། གལ་ཏེ་དེ་ལྟར་མ་བྱས་པར་ཁར་རྩང་དེ་རིང་གི་ཕ་མ་རྣམས་ཀྱི་བསམ་བློ་དང་། ཁོང་དག་གིས་བུ་རྒྱུད་ལམ་ལ་འཇོག་སྟངས་འདི་གཞིར་བཞག་གིས་མར་སོང་བ་ཡིན་ན། ལོ་བརྒྱ་ཉིས་བརྒྱ་ཕྱིན་ཡང་བོད་འདི་འཛམ་གླིང་མི་རིགས་ཀྱི་གྲལ་དུ་ཐོན་ཐུབ་ས་མ་རེད།
འོ་ན། རྒྱལ་ཁབ་ཀྱི་སློབ་གྲྭའི་ནང་དངོས་གཙོ་རིང་ལུགས་ཀྱི་སློབ་གསོ་ཁོ་ན་སྤྲོད་ཀྱི་ཡོད་པས་དེར་འཇོག་རྒྱུ་ཨེ་ཡོད་སྙམ་ན། དངོས་གཙོ་རང་ལུགས་ཀྱི་སློབ་གསོ་རེད་མོད་དེས་ཕལ་ཆེར་སྐྱོན་རྒྱུ་མ་རེད།དཔེར་ན། ང་ལ་མཚོན་ན་བོད་ཀྱི་སློབ་གྲྭ་ཆེན་མོ་པ་དང་། སློབ་མ་ཞིབ་འཇུག་སློབ་མའི་སློབ་ཚན་འདོན་བཞིན་ཡོད་པ་མན་ཆད་མང་པོར་ཐུག་ནས་ཁ་བརྡ་བྱས་པ་ཡིན་ཏེ། ཚང་མ་ལ་ཡང་ཆོས་ལུགས་ཀྱི་བསམ་པ་མེད་མཁན་ཟེར་བ་དེ་དཀོན་པོ་ཡིན་པར་མ་ཟད། མང་ཆེ་བ་མི་རིགས་དང་རིག་གནས་ལ་ལྷག་བསམ་ཡོད་པ།རིག་གནས་ཡོད་པ། ཆོས་ཀྱང་ཤེས་པ། གཉིས་ཀ་ཕུན་སུམ་ཚོགས་ནས་ཡོད་པ་དེ་འདྲ་རེད། དངོས་གཙོ་རང་ལུགས་ཀྱི་བསླབ་བྱ་བརྒྱབ་ནས་སློབ་གསོ་འཕྲོད་སོང་ས་གཅིག་གཉིས་རེ་ཡོད་རྒྱུ་རེད་དེ། དེ་ཙམ་སློབ་གྲྭར་མ་ཟད་དགོན་པའི་བནྡེ་གཟན་ཤམ་གྱོན་ཡོད་མཁན་དག་གི་ནང་དུ་ཡང་དེང་སང་འདྲ་དང་མི་འདྲ་ཟེར་མཁན་ཡོད་བཞིན་པ་རེད། དེ་ནི་ཆོས་མ་ཤེས་པའི་དབང་གིས་རེད།
མདོར་ན། ང་ཚོར་རིག་གནས་ཞིག་ཡོད་པ་ཡིན་ན་ཆོས་ཀྱི་ཐོག་ཏུ་བེད་སྤྱོད་བཏང་ནའང་འདྲ། འཇིག་རྟེན་གྱི་ཐོག་ཏུ་བེད་སྤྱོད་བཏང་ནའང་འདྲ། རལ་གྲི་ལག་ན་ཐོགས་པ་བཞིན་གང་ལ་གཡུག་ཀྱང་ཆོག་བསྡད་ཡོད་པ་རེད། དེས་ན་ཁྱེད་ཚོས་རིག་གནས་བཙན་རྒྱལ་རིང་ལུགས་ཟེར་བ་ཅི་ཞིག་ཡིན་པ་དང། རིག་གནས་བཙན་རྒྱལ་རིང་ལུགས་ཀྱི་ཁ་གཏད་ས་གང་ཡིན་ངེས་པར་དུ་ཤེས་སུ་འཇུག་དགོས།
བློ་སྦྱོང་གི་རྩ་བའི་ཁ་ཕྱོགས།
ཁྱད་པར་དུ་ཐོག་མཐའ་བར་གསུམ་དུ་མེད་དུ་མི་རུང་བ་ནི་བསམ་པའི་འཁྱེར་སོ་ཡང་དག་པའི་ལམ་དུ་འཁྲིད་པར་བྱེད་པའི་བློ་སྦྱོང་རྣམས་ཡིན་པས་ཐེག་པ་ཆེན་པོའི་བློ་སྦྱོང་བའི་མན་ངག་ཟབ་མོ་རྣམས་གནད་དུ་འཛིན་མ་ཐུབ་ན། དགོན་པ་དག་གི་ནང་དུ་ཡིན་ན་ཡང་བྱིས་པའི་དུས་ནས་ཁ་དོག་དཀར་དམར་བསླབས་ཏེ་རྩོད་པ་ཁོ་ན་བརྒྱག་ཏུ་བཅུག་ཀྱང་། རྒྱུ་འབྲས་ལ་ཡིད་ཆེས་དང་གཞན་ཕན་གྱི་བསམ་པ་ཞིག་མེད་ན་ཁ་དོག་དཀར་དམར་ཙམ་གྱིས་གང་ཡང་ཡོང་གི་མ་རེད། དེས་ན་བྱིས་པ་ཆུང་ཆུང་གི་དུས་ནས་བློ་སྦྱོང་འདི་སྲོག་གི་གནད་ངོ་མར་འཛིན་དགོས་པ་ལས་འདི་མ་ཡོད་ན་དོན་གྱི་སྙིང་པོ་ཤོར་ཚར་བ་རེད།
དགོན་པ་ཞིག་ཡིན་ནའང་འདྲ། བཤད་གྲྭ་ཞིག་ཡིན་ནའང་འདྲ། རྩ་བའི་ཁ་ཕྱོགས་ངོ་མ་ཐེག་པ་ཆེན་པོའི་བློ་སྦྱོང་འདི་ཡིན་པ་ལས་གཞན་པ་ཡན་ལག་ཙམ་རེད། འདི་གནད་དུ་འཛིན་མ་ཐུབ་པའི་དབང་གིས་བནྡེ་དག་གི་ནང་དུ་ཡང་བསྡུས་གྲྭ་རེ་ཤེས་ཀྱང་ལས་རྒྱུ་འབྲས་ལ་ཡང་ཡིད་ཆེས་ངོ་མ་ཞིག་གང་འདྲ་ཡིན་ནམ་སྙམ་པ་དེ་འདྲ་ཡང་ཡོང་གི་འདུག
དེ་དང་འདྲ་བར་ཆོས་ཟེར་བ་དེ་རང་གིས་ཡག་པོ་ཞིག་མ་གོ་ཕན་ཆོད་མི་སྐྱ་འགའ་རེས་ཆོས་འདི་མི་རིགས་ཡར་རྒྱས་ཀྱི་བཀག་རྡོ་ཡིན་ཚུལ་བཤད་པའི་སྟོབས་ཀྱིས་བནྡེ་ཕྱི་རོལ་དུ་གཟན་ཤམ་གྱོན་ཡོད་མཁན་ཞིག་ཡིན་ཡང་སེམས་ལ་དངོས་གནས་དེ་འདྲ་མིན་ནམ་སྙམ་པའི་དོགས་པ་སྐྱེ་མཁན་ཡང་ཡོད་སྲིད་པ་རེད། དེས་ན་དཔེར་ན། དམག་གི་ལས་ཀ་དངོས་གནས་དེ་མཐར་གཏུགས་ན་དགྲ་དང་འཐབ་རྒྱུ་ཡིན་པ་བཞིན། བནྡེ་ཞིག་ཡིན་ཕྱིན་ལས་ཀའི་རྩ་བ་ངོ་མ་དེ་དེང་རབས་ཀྱི་ཤེས་བྱ་སྦྱོང་རྒྱུ་མ་རེད་ལ། སྨན་དང་རྩིས་སྦྱོང་རྒྱུ་ཡང་མ་རེད། གང་རེད་ཅེ་ན། ཐེག་པ་ཆེན་པོའི་བློ་སྦྱོང་གིས་རྩ་བ་བྱེད་དགོས་པ་རེད། དེ་མ་ཡོད་ཕྱིན་ཇི་ལྟར་བཤད་ཀྱང་རྩ་བ་སྟོར་ཚར་བ་ཡིན་དུས་རྩ་བ་དངོས་ནས་འཛིན་དགོས་པ་རེད་ཟེར་བ་ཡིན།དེས་ན་དེ་ལྟ་བུའི་རྨང་གཞིའི་ཐོག་གཞི་ནས་བསྟན་འགྲོའི་དོན་ལ་ལྷག་བསམ་རྣམ་པར་དག་པའི་མང་ཐོས་ཚུལ་ལྡན་གྱི་གང་ཟག་སྐྱེད་སྲིང་བྱ་ཅི་ཐུབ་བྱ་བ་ལས་ལྷག་པའི་གནད་ཆེ་བའི་བྱ་བ་གང་ཡང་མེད།འདི་ཡང་ང་ཚོས་གསར་དུ་བཤད་པ་ཞིག་མིན་པར་སངས་རྒྱས་རང་ཉིད་གྱིས་གང་གསུངས་པ་དེ་ཡིན་དུས་དགོན་དཔོན་དག་གིས་ཀྱང་མུ་མཐུད་དགོན་དཔོན་བྱེད་བསམ་ན་དེ་ལྟར་དགོས།
གལ་ཏེ་སངས་རྒྱས་ཀྱི་བསྟན་པ་བཤད་སྒྲུབ་གཉིས་ལ་བྱ་བ་གང་ཡང་སྒྲུབ་མི་ཐུབ་ན་ཁོང་རང་ཉིད་ཀྱིས་དགོན་དཔོན་བྱ་རྒྱུ་བསྐྱུར་ཏེ་ཅུང་ཟད་བཟུར་ནས་ཟུར་དུ་སྡོད་དང་ཐུབ་མཁན་ཡོད་རྒྱུ་རེད། མི་གཅིག་གིས་ཐུབ་རུང་མ་ཐུབ་རུང་ས་བཅད་ནས་གཞན་ལ་གོ་སྐབས་མ་སྤྲད་ན་འགྲིག་གི་མ་རེད།
ལར་ང་ཚོས་ཆོས་ཟེར་བ་དེས་ཀྱང་། ཚེ་ཕྱི་མ་ལ་ཡིན་དང་ཡིན། ཕར་ལྟ་ས་འཇིག་རྟེན་ཚེ་འདིའི་ཐོག་ལ་ཡང་ཆོས་ཡོད་པའི་སྟོབས་ཀྱིས་འདི་ཕན་གི་རེད་ཟེར་བ་ཞིག་ཡོད་དགོས་ཀྱི་ཡོད་པ་ལས་ཕྱི་མ་ཁོ་ན་བཤད་བསྡད་པ་ཙམ་གྱིས་ཀྱང་དཀའ་ཙམ་ཡིན་པ་འདྲ། སངས་རྒྱས་བཅོམ་ལྡན་འདས་ཀྱི་དགོངས་པ་དངོས་དེ་ཡང་དེ་རེད། དེ་ཡང་རྒྱ་ཆེན་སྤྱོད་པའི་ལུགས་ཀྱི་བྱང་ཆུབ་སེམས་དཔའ་རྣམས་ཀྱི་ཉེས་བྱས་ཕྲ་བ་བཞི་བཅུ་ཞེ་དྲུག་གི་སྐབས་སུ་ཚེ་འདི་ལ་ཕན་ཐོགས་བཞིན་དུ་མ་བཏགས་ན་ཉེས་པ་གང་དང་གང་འདུག དེ་བཞིན་ཚེ་འདིའི་སྡུག་བསྔལ་བསལ་ནུས་བཞིན་མི་བསལ་ན་ཉེས་བྱས་ཅི་འདུག དེ་དག་ལ་བསམ་བློ་ཞིག་བཏང་ན་ཚེ་ཕྱི་མ་ཁོ་ནར་བསམ་བློ་གཏོང་རྒྱུ་ཙམ་མ་ཡིན་པ་གསལ་བོ་རེད། དེས་ན་མི་རྣམས་ཀྱི་བསམ་པའི་ནང་ལ་ཡང་ཆོས་ཟེར་བ་འདི་ཚེ་ཕྱི་མ་ཙམ་མ་ཟད་ཚེ་འདི་ལ་ཡང་སྤྱི་ཚོགས་ལ་ཁེ་ཕན་འདི་འདྲ་རེད་འདུག་བསམ་པའི་ནུས་པ་དེ་འདྲ་རིག་རྒྱུ་ཡོད་དགོས། དེ་ཡོད་པ་ཡིན་ན་དོན་མང་པོ་ཡོད་པ་རེད། འདི་དག་གི་ཕྱོགས་ལ་མཁན་པོ་རྣམ་པས་ཀྱང་ཐུགས་བསམ་བཞེས་དགོས་ཀྱི་འདུགདེ་འདྲ་མ་རེད་དགོངས་ན་འགྲིག་གིན་མི་འདུག་ཟེར་ནས་དགག་པ་བརྒྱབ་ན་ཡང་བཟང་བ་ལས་ཡོད་པ་མ་རེད། གལ་ཏེ་དགག་པ་མ་བརྒྱབ་ཀྱང་བཏང་སྙོམས་སུ་བཞག་ནའང་ཆོག གལ་ཏེ་དགོས་པ་ཞིག་རེད་དགོངས་ན་ནི་གོ་བཞིན་ཤེས་བཞིན་རྒྱུ་མཚན་ཡོད་བཞིན་དུ་བཏང་སྙོམས་སུ་མ་འཇོགཆོས་ཁྲིད་བཤད་པའི་ཞོར་ལ་ད་ཕན་ཆད་འདི་དང་འདི་ལྟ་བུ་དགོས་ཀྱི་འདུག་ཟེར་ནས་ཤོད། ང་ཚོ་བླ་རུང་ལྟ་བུར་མཚོན་ན་ཡང་། གྲྭ་པ་དང་མཁན་པོ་མང་པོ་ཕྱོགས་ཕྱོགས་སུ་འགྲོ་དང་འགྲོ་བཞིན་པ་ཡིན་ལ། དམིགས་བསལ་འཛིན་གྲྭའི་མཁན་པོ་དང་གསོ་སྐྱོང་དགོས་ངེས་ཕུད་དེ་མིན་གོ་ཆོད་མཁན་སུ་སོང་ཡང་དགའ་བསུ་ཡོད་པར་མ་ཟད། ཕར་སོང་ནས་ཀྱང་སློབ་སྦྱོང་བྱེད་སྟངས་སོགས་ཀྱི་སྐོར་འདི་རིགས་ཞིབ་ཏུ་གོ་བརྡ་སྤྲད་པ་ཡིན་ན་ནུས་པ་ཆེན་པོ་ཐོན་གྱི་རེད།འདི་ཡན་ཆད་གཙོ་བོ་བྱིས་པ་རྣམས་ཀྱིས་སློབ་སྦྱོང་བྱེད་སྟངས་སྐོར་ཡིན།
མཁས་དབང་ཚུལ་ཁྲིམས་བློ་གྲོས་ཀྱི་བཀའ་སློབ། ཕབ་སྒྲིག་པ་རྫ་ཚེ་རིང་བཀྲ་ཤིས། མུར་འགོད།
