日期: 2012-12-20
来自: ཨ་མའི་གླེབས་རིལ།
主题: འཛམ་གླིང་ཤར་ནུབ་ཀྱི་རིག་པའི་རྣམ་གཞག
༄༅། ། འཛམ་གླིང་ཤར་ནུབ་ཀྱི་གནའ་དེང་རིག་པའི་རྣམ་གཞག་མདོ་ཙམ་བརྗོད་པ་བློ་གསར་ཡིད་ཀྱི་བདུད་རྩི་ཞེས་བྱ་བ་བཞུགས་སོ། །
ཚུལ་ཁྲིམས་བློ་གྲོས་ཀྱིས།
༄༅།། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ།། སྒྲིབ་གཉིས་ཡོངས་དག་དག་པ་གཉིས་ལྡན་ཆོས་དབྱིངས་ནམ་མཁའ་ཡངས་པའི་ཀློང་།། མཁྱེན་གཉིས་ཡོངས་རྫོགས་རྫོགས་པའི་དཀྱིལ་འཁོར་ཀུན་ནས་གསལ་བའི་འོད་ཟེར་གྱིས།། སྲིད་པའི་མུན་བཅོམ་བཅོམ་ལྡན་མགོན་པོ་བདུད་རྩིའི་འོད་དཀར་སྤྲོ་བའི་དཔལ།། དུས་ཀྱི་མཐར་ཡང་ཡངས་པའི་འཇིག་རྟེན་དགེ་ལེགས་སྣང་བས་ཁྱབ་པར་མཛོད།། དེ་ཡང་མུ་མཐའ་དང་བྲལ་བའི་འཇིག་རྟེན་གྱི་ཁམས་འདི་ན་སྐར་མའི་ཚོགས་བགྲང་གིས་མི་ལང་པ་ཞིག་གནས་པའི་ཁྲོད་ནས་ས་ལྒང་ཞེས་པའི་སྐར་འབྲུ་ཆུང་ངུ་འདི་གནས་ཏེ། རྒྱ་མཚོ་ཆེན་པོའི་ནང་གི་ཆུའི་རྡུལ་ཕྲན་གཅིག་ཙམ་གྱི་ཚད་དོ། །
དེའི་ངོས་སུ་ཤིན་ཏུ་སྔ་མོ་ཞིག་ནས་མིའི་འགྲོ་བ་ཆགས་ནས་འཚོ་ཞིང་གནས་ལ། དེ་རྣམས་ཀྱི་ཚུལ་དང་མཐུན་པ་དང་མི་མཐུན་པའི་འཚོ་བའི་ཐབས་སྣ་ཚོགས་པ་བཙལ་བས་རིག་པའི་རྣམ་གྲངས་ཤིན་ཏུ་མང་པོ་དག་དར་བར་གྱུར། དེ་དག་རེ་རེ་ནས་བརྗོད་ཀྱིས་ཀྱང་མི་ལང་ལ་བརྗོད་པ་ལ་དགོས་པའང་ཆེར་མེད་དོ། །
དེས་ན་འདིར་སྐབས་སུ་བབ་པའི་རིག་པ་གསུམ་གྱི་རྣམ་གཞག་མདོར་བསྡུས་ཙམ་ཞིག་བརྗོད་པར་འདོད་དེ། གང་ཞེ་ན། ནུབ་ཕྱོགས་ཀྱི་མཚན་ཉིད་རིག་པ་དང་། ཚན་རིག་དང་། སངས་རྒྱས་ཀྱི་རིག་པ་སྟེ་འདི་གསུམ་ནི་རིག་པ་ཤེས་པར་འདོད་པའི་སྐྱེ་བོ་མང་པོའི་གཏམ་གྱི་གཞིར་བྱེད་པའི་ཕྱིར་རོ། །
དེ་ལས་དང་པོ་མཚན་ཉིད་རིག་པ་ཞེས་པ་འདི་ལ་ཡུལ་གྱི་སྒོ་ནས་དབྱེ་ན་འཛམ་གླིང་ཤར་ནས་བྱུང་བ་དང་ནུབ་ནས་བྱུང་བ་ཞེས་གཉིས་སུ་བྱེད་པར་སྣང་མོད། འདིར་ནི་ནུབ་ཕྱོགས་ཀྱི་མཚན་ཉིད་རིག་པའི་འདོད་པ་འགའ་ཞིག་བརྗོད་པར་བྱ་སྟེ། དང་པོ་དེའི་ངོ་བོ་ནི། སྒྲ་ཡངས་དོག་གཉིས་ཡོད་དེ། སྒྲ་དོག་པའི་དབང་དུ་བྱས་ན། གནའ་རབས་ཧེ་ལིན་(Hellene,希臘)གྱི་མིས་སྲོལ་བཏོད་པའི་གཏན་ཚིགས་ལ་བརྟེན་ནས་མཐར་ཐུག་གི་དཀའ་གནས་རྣམས་ལ་རྟོག་དཔྱོད་བྱེད་པའི་རིག་པའོ། །
སྒྲ་ཡངས་པའི་དབང་དུ་བྱས་ན་ནི་མཐར་ཐུག་གི་དཀའ་གནས་ལ་རྟོག་དཔྱོད་བྱེད་པའི་རིག་པའོ། །
མཐར་ཐུག་གི་དཀའ་གནས་ཞེས་པ་ནི་རང་དབང་དང་། བདེ་སྐྱིད་དང་། མི་ཚེའི་སྙིང་དོན་དང་། འཆི་བ་དང་། དུས་དང་། འཇིག་རྟེན་གྱི་ངོ་བོ་ལ་སོགས་པ་ཡིན་ནོ། །
གཉིས་པ་སྒྲ་དོན་ནི། ཤེས་རབ་ལ་དགའ་བའམ་ཤེས་རབ་དོན་དུ་གཉེར་བའི་འདུན་པ་(Philosophy,哲學、愛智慧) ཞིག་ཡིན་ཞེས་ཟེར་རོ། །
གསུམ་པ་དེ་ཇི་ལྟར་དར་ཚུལ་ནི། ནུབ་ཕྱོགས་མཚན་ཉིད་རིག་པའི་མགོ་འཛུགས་པར་བྱེད་པའི་ཆེས་ཐོག་མའི་མཚན་ཉིད་རིག་པ་པ་ནི་ཕྱི་ལོ་མགོ་ཚུགས་པའི་སྔོན་གྱི་ལོ་༥༨༥པའམ་༥༨༤པ་ཙམ་ན་སྐྱེས་པའི་མི་ཐེ་ལེ་སི་(Thales,泰利斯)ཞེས་པ་དེ་ཡིན་པར་ཀུན་ཀྱིས་འདོད། ཅིའི་ཕྱིར་ཞེ་ན། དེས་ཆེས་སྔ་བར་འཇིག་རྟེན་གྱི་རང་བཞིན་ནམ་རྩོམ་གཞི་དེ་གང་ཞིག་ཡིན་ཞེས་པའི་དྲི་བ་བཏོན་ཅིང་། ཁོང་རང་གིས་འཇིག་རྟེན་གྱི་རང་བཞིན་ནམ་རྩོམ་གཞི་ནི་ཆུ་ཡིན་ཞེས་འདོད། འཇིག་རྟེན་གྱི་རང་བཞིན་ཆུ་ཙམ་ཞིག་ཡིན་པར་མི་འཐད་མོད། འོན་ཀྱང་འཇིག་རྟེན་གྱི་རང་བཞིན་གང་ཡིན་ལ་རྟོག་དཔྱོད་བྱས་ཤིང་ལན་ཡང་བཏབ་པས་ཚུལ་འདིས་མཚན་ཉིད་རིག་པའི་བསམ་གཞིགས་བྱེད་པའི་སྲོལ་ཕྱེས་པ་ཡིན་པར་བཞག་གོ །
དེའི་སློབ་མ་ཕྱི་ལོའི་སྔོན་གྱི་ལོ་༥༧༠ཙམ་ན་བྱུང་བ་ཨ་ནག་ཁི་ཤིས་མན་ཏིར་(Anaximander,阿那可西曼德)ཞེས་པས་ས་ཆུ་མེ་རླངས་གང་རུང་གཅིག་ཁོ་ན་ལས་དངོས་པོ་ཐམས་ཅད་འབྱུང་བ་མ་ཡིན་ཏེ། དེས་ན་འཇིག་རྟེན་གྱི་རྩོམ་གཞི་ནི་མ་ངེས་པ་ཞེས་བྱ་བ་ཡིན་ཟེར། དེའི་སློབ་མ་ཕྱི་ལོའི་སྔོན་གྱི་ལོ་༥༤༦ཙམ་ན་བྱུང་བ་ཨ་ནག་ཁི་མེ་ནེ་སི་(Anaximenes,阿那可西美尼)ཞེས་པས་དངོས་པོ་ཐམས་ཅད་ཀྱི་རྩོམ་གཞི་ནི་རླངས་པ་ཡིན་ཏེ། རླངས་པ་དེ་ཉིད་རླུང་དང་སྤྲིན་དང་ཆུ་དང་ས་དང་རྡོ་རྣམས་སུ་འགྱུར་བ་ཡིན་ཞེས་ཟེར། ཕྱི་ལོའི་སྔོན་གྱི་ལོ་༥༠༡ཙམ་ན་སྐྱེས་པ་ཧི་ར་ཁི་ལིས་ཐི་(Heraclitus,赫拉克利特)ཞེས་པས་འཇིག་རྟེན་གྱི་རང་བཞིན་མེ་ཡིན་ཟེར། ཕྱི་ལོའི་སྔོན་གྱི་ལོ་༤༩༥ནས་༤༣༥བར་དུ་བྱུང་བ་ཨེམ་ཕེ་ཏོ་ཁི་ལེ་སི་(Empedocles,恩培多克勒)ཞེས་པས་དངོས་པོ་ཐམས་ཅད་ཀྱི་རྩོམ་གཞི་ནི་ས་ཆུ་མེ་རླངས་ཏེ་རྩ་བ་བཞི་པོ་འདི་ཡིན་ཏེ། འདི་རྣམས་འདུས་པ་ལས་དངོས་པོ་ཐམས་ཅད་འབྱུང་ཞིང་། གྱེས་པ་ལས་འགག་པ་ཡིན་ཟེར་རོ། །
འཇིག་རྟེན་གྱི་རྩོམ་གཞིའི་ཐད་ལ་དེ་རྣམས་ལས་གཞན་ཡང་འདོད་པ་མི་འདྲ་བ་དུ་མ་ཞིག་འདུག་སྟེ་རྣམ་རྟོག་གི་རི་མོ་ལ་ཟད་པ་མེད་དོ། །
ཕྱི་ལོའི་སྔོན་གྱི་ལོ་༤༦༩ནས་༣༩༩བར་དུ་བྱུང་བ་སོ་ཀི་ར་ཐིས་(Socrates,苏格拉底)ཞེས་པ་དང་། ཕྱི་ལོའི་སྔོན་གྱི་ལོ་༤༢༧ནས་༣༤༧བར་དུ་བྱུང་བ་ཕོ་ལ་ཐོ་(Plato,柏拉圖)ཞེས་པ་དང་། ལོ་༣༨༤ནས་༣༢༢བར་དུ་ཨ་རིས་སི་ཐོ་ཐེལ་(Aristotle,亚里士多德)ཞེས་པ་བྱུང་སྟེ། འདི་རྣམས་ཕྱི་མ་ཕྱི་མ་སྔ་མ་སྔ་མའི་སློབ་མ་ཡིན་ཞིང་། འདི་གསུམ་ལ་གནའ་རབས་ཧེ་ལིན་མིའི་རླབས་ཆེན་གྱི་མཚན་ཉིད་རིག་པ་རྣམས་གསུམ་ཞེས་གྲགས་ཏེ། གཞུང་ཡང་མང་པོ་བྲིས། ཁོང་ཚོའི་བསམ་པ་འདིས་ནུབ་ཕྱོགས་ཀྱི་སྤྱི་ཚོགས་སུ་རིག་གནས། ཆབ་སྲིད། ཀུན་སྤྱོད། ཚན་རིག་བཅས་ལ་ད་ལྟའི་བར་དུ་ཤུགས་རྐྱེན་ཆེན་པོ་ཐེབས་ནས་ཡོད་དོ། །
མདོར་ན། ནུབ་ཕྱོགས་ཀྱི་མཚན་ཉིད་རིག་པ་སྨྲ་བ་རྣམས་ལ། ནང་གསེས་ཀྱིས་དབྱེ་ན་ཆེ་གེ་མོའི་རིང་ལུགས་དང་ག་གེ་མོའི་རིང་ལུགས་ཞེས་རྣམ་རྟོག་གི་འཛིན་མཚམས་ཉི་ཚེ་བ་ཤིན་ཏུ་མང་པོ་འདུག འོན་ཀྱང་དེ་རྣམས་ཐམས་ཅད་བསྡུས་ན་དངོས་གཙོ་པ་དང་སེམས་གཙོ་པ་ཞེས་གྲུབ་མཐའ་གཉིས་སུ་ཕྱིས་བྱུང་འགའ་ཞིག་གིས་བསྡུས་སོ། །
བཞི་པ་གྲུབ་མཐའི་རྣམ་གཞག་ནི། དེ་ལས་འདིར་ནི་དངོས་གཙོ་སྨྲ་བ་ལས་ཉེ་རབས་འགྱུར་མེད་དམ་འཕྲུལ་ཆས་ལྟ་བུར་སྨྲ་བའི་ལུགས་དང་། སེམས་གཙོ་སྨྲ་བ་ལས་ཉམས་མྱོང་སྨྲ་བའི་ལུགས་དང་། གཞན་རྒྱུ་གཉིས་སྨྲ་བའི་ལུགས་དང་གསུམ་ཙམ་ཞིག་བརྗོད་པར་བྱ་སྟེ། དང་པོ་ནི། ཕྱི་ལོ་༡༥༨༨ནས་༡༦༧༩བར་དུ་བྱུང་བ་དབྱིན་ཇིའི་དངོས་གཙོ་པ་ཧོ་པོ་ཧྲི་(Thomas Hobbes,1588-1679托馬斯‧霍布斯)
ཞེས་པ་ན་རེ། ཕྱིའི་འཇིག་རྟེན་མི་དང་བཅས་པ་ནི་འཕྲུལ་ཆས་ཤིག་ཡིན་ཏེ། འཇིག་རྟེན་ནི་རྒྱུ་དང་འབྲས་བུའི་འབྲེལ་བ་ལས་གྲུབ་པའི་འཕྲུལ་ཆས་ཆེན་པོ་ཡིན་ལ། མི་ནི་འཕྲུལ་ཆས་ཆེན་པོ་འདིའི་ནང་གི་འཕྲུལ་ཆས་ཆུང་ངུ་ཞིག་ཡིན། མི་དང་དུས་ཚོད་འཁོར་ལོ་གཉིས་འདྲ་སྟེ། མིའི་སྙིང་ནི་དུས་ཚོད་འཁོར་ལོའི་ནུས་ཤུགས་འཛིན་བྱེད་ཀྱི་ཐག་པ་(髮條)ལྟ་བུ་ཡིན། དབང་རྩ་ནི་དུས་ཚད་འཛིན་པར་བྱེད་པའི་ཐག་པ་ཕྲ་བ་(游絲)ལྟ་བུ་ཡིན། ལྷུ་ཚིགས་རྣམས་ནི་སོ་འཁོར་(齒輪)ཏེ་སོ་ལྡན་འཁོར་ལོ་ཡིན། འཕྲུལ་ཆས་ཀྱི་ལྷུ་ལག་འདི་རྣམས་ཀྱིས་གཅིག་གིས་གཅིག་བསྒུལ་ཏེ་མིའི་ཚེ་སྲོག་གི་བསྒུལ་བསྐྱོད་གྲུབ་པ་ཡིན་ཞེས་ཟེར་རོ། །
དེ་བཞིན་དུ་ཧྥ་རེན་སེའི་སྨན་པ་ལ་མས་ཐི་རིས་(Julian Offray de la Mettrie,1709-1751拉梅特利)ཞེས་པས་ཀྱང་། མི་འཕྲུལ་ཆས་ཡིན། ཞེས་པའི་གཞུང་བརྩམས་ཏེ། མིའི་རིགས་ཀྱི་རང་བཞིན་ནི་འཕྲུལ་ཆས་ཙམ་ཞིག་ཡིན་པར་བཤད་དེ། མིའི་ལུས་འདི་ཤིན་ཏུ་མཁས་པའི་འཕྲུལ་ཆས་ཤིག་རེད། ལུས་ཕུན་སུམ་ཚོགས་པའི་དུད་འགྲོ་རྣམས་ལས་འཕྲུལ་ཆས་ཀྱི་ལྷུ་ལག་འགའ་ཞིག་མང་བ་དང་། ཀླད་ཆེན་དང་སྙིང་གཉིས་ཀྱི་བར་ཐག་ཅུང་ཟད་ཉེ་བས་ན་སྙིང་གི་ཁྲག་བཞུར་ཚད་འདང་ལ། དེའི་དབང་གིས་དོན་ཤེས་པ་དེ་བྱུང་བ་ཡིན། མྱོང་ཚོར་འདི་དག་ཇི་ལྟར་སྐྱེ་བའི་ཚུལ་དངོས་དེ་ད་དུང་མི་ཤེས་མོད། མིའི་ལུས་ཀྱི་གྲུབ་ཚུལ་གསལ་བར་བསྟན་ཏེ། ཡིད་ཀྱི་རྣམ་པར་ཤེས་པ་ཞེས་པ་དེ་ནི་བརྗོད་བྱ་མེད་པའི་མིང་རྐྱང་ཙམ་ཞིག་རེད་ཅེས་ཟེར་རོ། །
སྨན་པ་ལ་མས་ཐི་རིའི་ལྟ་བ་དེ་དག་ནི་འོག་ཏུ་འཆད་པར་འགྱུར་བའི་རེ་ནེ་རྡེ་གར་ཐུའི་མི་དང་དུད་འགྲོའི་ལུས་འཕྲུལ་ཆས་ཡིན་ཞེས་པའི་ལྟ་བ་དེར་གཞི་བཅོལ་བའི་སྟེང་དུ་རྡེ་གར་ཐུས་མི་ལ་རྣམ་ཤེས་ཡོད་ཅེས་པ་དེ་དོར་ནས་མི་དང་དུད་འགྲོ་གཉིས་ཆར་འཕྲུལ་ཆས་འབའ་ཞིག་ཡིན་ཞེས་སྨྲ་སྟེ། ཚུལ་འདི་ལ་འགྱུར་མེད་དངོས་གཙོ་སྨྲ་བ་ཞེས་སུ་གྲགས་སོ། །
གཞན་ཡང་མར་ཁེ་སི་ལ་སོགས་པ་དག་གིས་ཀྱང་དངོས་གཙོ་པའི་ཕྱོགས་བསྐྱངས་མོད། འོན་ཀྱང་འདི་ལ་རྩོད་སྒྲུབ་དངོས་གཙོ་སྨྲ་བ་ཟེར་ཏེ། སྔ་མ་རྣམས་དང་ཅུང་ཟད་མི་འདྲ་བར་བྱེད། དངོས་གཙོ་སྨྲ་བ་དེ་དག་གི་ལྟ་བ་ནི། དངོས་པོ་ཁོ་ན་དོན་ལ་གནས་པའི་བདེན་པར་གྲུབ་པ་ཡིན། སེམས་སམ་ཡིད་ནི་ཀླད་ཆེན་ལས་བྱུང་བའི་དངོས་པོའི་རྣམ་འགྱུར་ཙམ་ཞིག་ཡིན་གྱི། ཀླད་ཆེན་ལས་ལོགས་སུ་གནས་པའི་ཡིད་དམ་རྣམ་ཤེས་ཞེས་པ་ཞིག་མེད་ཅེས་ཐག་གཅོད། དེས་ན་ཚེ་སྔ་ཕྱི་དང་ལས་དགེ་སྡིག་དང་དེའི་འབྲས་བུ་དང་། སེམས་ཁམས་ཀྱི་ནུས་པ་ཁྱད་པར་བ་དག་དང་ལྷ་དང་འདྲེ་ཞེས་པའི་སེམས་ཅན་དག་ཀྱང་ཡོད་པར་ཁས་མི་ལེན། ཁོང་ཅག་གིས་དངོས་པོ་ཞེས་པ་ནི་བེམ་པོ་ཁོ་ན་ལ་ཟེར་བར་འདུག དེའི་སྒྲུབ་བྱེད་ནི་དུས་རབས་བཅུ་བདུན་པའི་ནང་ནས་དབང་རྩའི་ཚན་རིག་གི་ཤེས་ཡོན་རིམ་གྱིས་དར་རྒྱས་སུ་བྱུང་བས་དེ་ལ་འཇུ་བར་བྱེད་དོ། །
འོན་ཀྱང་དབང་རྩའི་ཚན་རིག་དེ་ཕྱིས་སུ་འཕེལ་རྒྱས་སུ་སོང་ནས་ཚན་རིག་པ་གྲགས་ཅན་མང་པོས་རྣམ་ཤེས་ཞེས་པ་ཀླད་ཆེན་ལས་ལོགས་སུ་ཡོད་པའི་ཕྱོགས་འཛིན་པར་བྱེད་པས་དེས་འགྲུབ་དཀའ་བར་གྱུར་ཏེ་འོག་ཏུ་འཆད་དོ། །
དངོས་གཙོ་པ་ལ་གོང་དུ་སྨྲས་པ་དེ་གཉིས་དང་གཞན་གནའ་བོའི་དུས་སུ་བྱུང་བའི་གདོད་མའི་དངོས་གཙོ་སྨྲ་བ་སྟེ་གསུམ་དུ་བྱུང་མོད། ཚེ་སྔ་ཕྱི་དང་ལས་རྒྱུ་འབྲས་སོགས་ཁས་མི་ལེན་པ་ལ་ཁྱད་པར་མེད་དོ། །
གཉིས་པ་སེམས་གཙོ་སྨྲ་བ་ནི། ནུབ་ཕྱོགས་ཀྱི་མཚན་ཉིད་རིག་པ་སྨྲ་བ་ཕལ་མོ་ཆེ་ཞིག་སེམས་གཙོ་པའི་ལྟ་བ་འཛིན་པ་ཡིན། དེའི་ནང་ནས་འདིར་བརྗོད་པར་བྱ་བ་ནི། ཨེར་ལན་གྱི་མི་པེར་ཁི་ལེའི་(喬治‧貝克萊George Berkeley,1685-1753)རིང་ལུགས་ཉམས་མྱོང་སེམས་གཙོ་སྨྲ་བའི་རིགས་པ་དེ་ཉིད་ཡིན་ཏེ། ཁོང་གིས་ལྷ་མེད་སྨྲ་བའི་གྲུབ་མཐའ་འགོག་པའི་ཕྱིར་དུ་དངོས་པོ་ཐམས་ཅད་ནི་སེམས་ཀྱི་ཉམས་མྱོང་ཙམ་ཡིན་གྱི། དེ་ལས་ལོགས་སུ་ཅི་ཡང་གྲུབ་པ་མེད་ཅེས་ཟེར་ཏེ། དེ་ན་རེ། དངོས་པོའམ་བེམ་པོ་ནི་ལྷ་མེད་སྨྲ་བ་རྣམས་ཀྱི་མགོན་ཡིན་ཏེ། ཁོ་ཚོའི་རྣམ་གཞག་ཉམས་མཚར་པ་དེ་དག་ཐམས་ཅད་འདི་ལ་མངོན་གསལ་དང་དགོས་ངེས་ཀྱི་སྒོ་ནས་བརྟེན་པ་ཡིན་པས། རྨང་རྡོ་འདི་བཏོན་ཚེ་ཁང་བརྩེགས་ཡོངས་རྫོགས་མི་འགྱེལ་ཐབས་མེད་ཡིན། ཞེས་དང་། རང་རེའི་དབང་པོ་རྣམས་ལ་བརྟེན་ནས་ཤེས་ཤིང་མྱོང་བའི་དོན་འདི་ལས་མྱང་བར་བྱ་བའི་དོན་གཞན་ཅི་ཞིག་ཡོད་ཅེས་དང་། ནམ་མཁའི་གཟའ་སྐར་དང་། ས་སྟེང་གི་རི་ལུང་ཡུལ་ལྗོངས། འཇིག་རྟེན་ཁམས་ཀྱི་དངོས་ཡོད་ཀྱི་དོན་ཐམས་ཅད་པོ་གང་ཟག་གི་རྣམ་པར་ཤེས་པ་ལས་ལོགས་སུ་རང་རྐྱ་ཐུབ་པ་གཅིག་ཀྱང་མེད། དེ་དག་གི་ཡོད་པ་ནི་གང་ཟག་གི་སེམས་ཀྱིས་ཤེས་པའམ་མྱོང་ཚོར་ཙམ་ཞིག་ཡིན། ངེད་ཀྱི་ཡི་གེ་འབྲི་གདན་ཅོག་ཙེ་འདི་ངའི་མིག་གིས་མཐོང་། ལག་པས་རེག་རྒྱུ་ཡོད་པ་དེའི་ཕྱིར་ན་བདེན་པར་གནས་པ་ཡིན་ཞེས་འདོད་པ་ཡིན། ངེད་དཔེ་ཆའི་ཁང་པ་འདི་ལས་ཕྱིར་ཐོན་པའི་ཚེ་གལ་ཏེ་ད་དུང་ཡང་དེ་ཡོད་ཟེར་བ་ནི་སྔོན་མཐོང་བའི་རྒྱུ་མཚན་གྱིས་ཡིན། བདེན་པར་གནས་ཞེས་པ་ནི་མྱོང་ཚོར་གྱི་དོན་ཡིན། དེ་མིའི་སེམས་ནང་དུ་གནས་པ་ཡིན། གལ་ཏེ་སེམས་མེད་ན་དངོས་པོ་རང་ཉིད་མིའི་ལུས་ཀྱི་ནང་དུ་འཛུལ་ཏེ་འོང་མི་སྲིད་དེ། དངོས་པོ་དེ་མིའི་འཇིག་རྟེན་གྱི་ཆ་ཤས་ཤིག་ཏུ་འགྱུར་ཡང་མི་སྲིད། དངོས་པོ་དེ་རང་གིས་མ་མྱོང་བའི་ཚེ་ན། ད་དུང་དེ་རང་གི་འཇིག་རྟེན་གྱི་ནང་གི་དངོས་པོ་མ་ཡིན། དེ་རང་གི་འཇིག་རྟེན་གྱི་ནང་དུ་གནས་པ་ཡིན་ཞེས་སྨྲར་མེད། དེའི་ཕྱིར་རང་གི་འཇིག་རྟེན་དེ་ལ་ལྟོས་ན། དེ་མ་གྲུབ་པ་ཡིན། དངོས་པོ་གང་ཡིན་ཡང་དེ་ཤེས་ཤིང་ཚོར་བའི་ཚེ་ན་ད་གདོད་གྲུབ་པ་མ་ཡིན་པ་མེད་ཟེར། དེ་ལྟ་ན། ཤིང་ལྗོན་པ་ཞིག་ལ་མཚོན་ན། དེ་ལ་མིག་གིས་ལྟ་མཁན་མེད་པའི་ཚེ་ན་དེ་རྒྱུན་ཆད་དེ་མེད་པར་འགྱུར་བ་མ་ཡིན་ནམ་ཞེ་ན། ཁོ་ན་རེ། སྐྱོན་མེད་དེ། ལྷ་ཡིས་རྒྱུན་དུ་ཆོས་ཐམས་ཅད་ཤེས་ཤིང་ཚོར་བ་ཡིན་པའི་ཕྱིར། གལ་ཏེ། དངོས་གནས་ལྷ་དེའང་མེད་ན་ནི། ང་ཚོས་དངོས་པོར་གཟུང་བའི་ཆོས་འདི་དག་ཤིན་ཏུ་མི་བརྟན་པར་འགྱུར་ཏེ། ང་ཚོས་མིག་གིས་ལྟ་བའི་ཚེ་ན་གདོད་གློ་བུར་དུ་གྲུབ་པ་ཡིན་པར་འགྱུར་བའི་ཕྱིར། དེས་ན་ལྷའི་ཤེས་པའི་མྱོང་ཚོར་དེའི་མཐུས་རི་བྲག་དང་། ནགས་ཚལ་དང་། རྡོ་སོགས་ཐམས་ཅད་ཕལ་བའི་ཤེས་པའི་འཛིན་ཚུལ་ལྟར་དུ་བར་མ་ཆད་དུ་གནས་པ་ཡིན། འདི་ནི་ལྷ་ཡོད་པའི་སྒྲུབ་བྱེད་སྟོབས་ལྡན་ཡང་ཡིན་ཞེས་ཟེར་རོ། །
ཁོས་ཐམས་ཅད་སེམས་ཡིན་པའི་སྒྲུབ་བྱེད་དུ། གལ་ཏེ་མི་ཞིག་གིས་ལག་པ་གཅིག་ཆུ་ཚ་པོའི་ནང་དུ་བཅུག་ལ། ཅིག་ཤོས་ཆུ་གྲང་མོའི་ནང་དུ་བཅུག་སྟེ། དེ་ནས་ལག་པ་གཉིས་ཀ་མཉམ་དུ་ཆུ་འཇམ་པོ་ཞིག་གི་ནང་དུ་བཅུག་ན། ཆུ་ཚ་པོའི་ནང་དུ་བཅུག་པའི་ལག་པ་དེས་ཆུ་འཇམ་པོ་གྲང་བར་མྱོང་། ཆུ་གྲང་མོའི་ནང་དུ་བཅུག་པའི་ལག་པ་དེས་ནི་ཆུ་འཇམ་པོ་དེ་ཚ་བར་མྱོང་མོད། དོན་ལ་ཆུ་དེ་ཚ་པོའང་ཡིན་ལ་གྲང་མོའང་ཡིན་པ་ནི་མི་སྲིད་པས་ཚ་གྲང་གཉིས་ཀ་སེམས་ཀྱི་མྱོང་ཚོར་ཙམ་ཞིག་རེད་ཅེས་འགོད་ཅིང་དེ་དོན་གཞན་རྣམས་ལའང་འགྲེ་བར་བྱེད་དོ། །
མུར་འགོད།
