འབག་སྐུར་མཇལ་བའི་ཨ་ནེ།

འབག་སྐུར་མཇལ་བའི་ཨ་ནེ། 

 

            ^{འཇུ་སྐལ་བཟང་།}

^{ཨ་ནེས་ས་ཐག་རིང་བོ་ནས། །}

^{རེ་བ་རྒྱབ་གང་ཁུར་ཞིང་འོང༌། །}

^{འདོད་པ་རུམ་གང་བཅུག་ཅིང་འོང༌། །}

^{འབག་སྐུའི་མདུན་དུ་འདི་ལྟར་སྤུངས། །}

^{དགོངས་ཤིག་ལྷ་སྐུ་རིན་པོ་ཆེ། །}

^{ཨ་ནེ་ཐག་རིང་ས་ནས་འོང༌། །}

^{ཨ་ནེ་ཡང་ཡང་མི་ཐོན་པས། །}

^{ཨ་ནེའི་འདོད་དོན་བསྩལ་དུ་གསོལ། །}

^{མི་ལ་ན་ཚ་འོང་མི་རུང༌། །}

^{ཨ་ནེར་ནད་གཡོག་བྱེད་མཁན་མེད། །}

^{ཕྱུགས་ལ་གྱོང་གུད་འོང་མི་རུང༌། །}

^{ཨ་ནེའི་འཚོ་བ་རྟེན་ས་ཡིན། །}

^{རྒྱལ་ཁམས་ཡོངས་ལ་ལོ་ལེགས་དགོས། །}

^{ཨ་ནེའི་གནས་ཚང་ཆགས་ས་ཡིན། །}

^{དགྲ་ཁ་རྐུན་ཇག་མེད་པར་ཞུ། །}

^{ཨ་ནེར་དམག་ལ་འགྲོ་རོགས་མེད། །}

^{ཕྱི་མར་དམྱལ་བར་གཏོང་མི་རུང༌། །}

^{ཨ་ནེས་མནར་གཅོད་བཟོད་མི་ནུས། །}

^{རབ་ན་ཨ་ནེ་སངས་རྒྱས་དགོས། །}

^{ཨ་ནེས་ལས་ཀ་ལས་མི་ཐུབ། །}

^{ཨ་ནེར་བུ་ཞིག་སྐྱེ་དགོས་ཏེ། །}

^{ཨ་ནའི་རེ་ལྟོས་འཆའ་ས་ཡིན། །}

^{བུ་ལ་ད་དུང་བུ་སྐྱེ་དགོས། །}

^{ཨ་ནེའི་མི་རྒྱུད་ཆད་མི་རུང༌། །}

^{ཨ་ནེའི་མིག་ཀོང་ཕོར་བ་ཙམ། །}

^{བགྲད་དེ་འབག་སྐུའི་ཞལ་ལ་ཅེར། །}

^{འབག་སྐུས་མིག་ལྩིབས་ལྷེམ་ལྷེམ་ངང༌། །}

^{ཨ་ནེའི་གདོང་ལ་བར་མེད་ལྟ། །}